ایران اور روس کے دوستانہ اور تعمیری تعلقات کے مزید فروغ پر تاکید
اسلامی جمہوریہ ایران کی وزارت خارجہ کے ترجمان ناصر کنعانی نے روس کی وزارت خارجہ کی ترجمان ماریا زاخارووا سے ماسکو میں ملاقات اور بات چیت کی ہے۔
سحر نیوز/ ایران: موصولہ رپورٹ کے مطابق ایران کی وزارت خارجہ کے ترجمان ناصر کنعانی ان دنوں بریکس اجلاس میں شرکت کی غرض سے روس کے دورے پر ہیں ۔ اس موقع پر انھوں نے برازیل اور متحدہ عرب امارات سمیت مختلف ملکوں کے حکام سے ملاقاتیں کی ہیں۔
روسی وزارت خارجہ کی ترجمان سے ہونے والی ملاقات میں ایران اور روس کے دوستانہ اور تعمیری تعلقات کے مختلف پہلوؤں کا جائزہ لیا گيا اور انھیں مزید فروغ دینے پر زور دیا گيا۔
اس سے قبل ایرانی وزارت خارجہ کے ترجمان نے ماسکو یونیورسٹی کے ایرانی ثقافت و زبان کے مرکز کا دورہ کیا اور اس مرکز کے سربراہ سے ملاقات کی۔ اس موقع پر ناصر کنعانی نے روس میں فارسی زبان کے فروغ کے لیے ایران کی طرف سے ہر قسم کی مدد کا یقین دلایا۔
