پیرس اولمپکس میں ایرانی کھلاڑیوں کی شاندار کارکردگی، صدر مملکت نے دی مبارکباد: مجھے تم پر فخر ہے
صدر مملکت ڈاکٹر مسعود پزشکیان نے اپنے ایکس پیج پر پیرس اولمپکس میں میڈل جیتنے والے ایرانی کھلاڑیوں کو مبارکباد پیش کی ہے۔
سحرنیوز/ایران: ارنا کی رپورٹ کے مطابق ایران کی تائیکوانڈو کھلاڑی مبینا نعمت زادہ نے پیرس میں ہونے والے اولمپکس گیمز میں انچاس کلوگرام کے وزن کی کیٹیگری میں سعودی عرب کی کھلاڑی کو ہرا کر برنز کا تمغہ جیتا ہے جبکہ محمد ہادی ساروی نے کشتی کے مقابلے میں 97 کلوگرام وزن کی کیٹیگری میں سونے کا تمغہ جیتا ہے۔
صدر مملکت ڈاکٹر مسعود پزشکیان نے ان دونوں کھلاڑیوں کے نام اپنے الگ الگ پیغامات میں انہیں مبارکباد پیش کی۔ صدر مملکت نے محترمہ مبینا نعمت زادہ کو مبارکباد پیش کرتے ہوئے لکھا ہے کہ ہماری سرزمین کی خواتین ہماری زندگی میں رنگ بھرتی ہیں۔
بیٹی مبینا نعمت زادہ مجھے تم پر اور ایران کی تمام خواتین اور لڑکیوں پر فخر ہے۔ صدر مملکت نے محمد ہادی ساروی کے نام مبارکباد کے پیغام میں لکھا ہے کہ محمد ہادی ساروی تمہارا سونے کا تمغہ ہمارے ملک کے عوام کے لئے امید کا حامل ہے۔ میں تمہیں اور ایرانی عوام کو یہ میڈل حاصل کرنے پر مبارکباد پیش کرتا ہوں۔
