SAHAR

رہبر انقلاب اسلامی آيت اللہ العظمی سید علی خامنہ ای نے مزاحمتی محاذ کے عزیز جوانوں کے نام اپنے پیغام میں حزب اللہ کی ایگزیکٹو کونسل کے سربراہ سید ہاشم صفی الدین رضوان اللہ علیہ کی شخصیت کو خراج عقیدت پیش کرتے ہوئے کہا ہے کہ حزب اللہ آج بھی لبنان کی سب سے مضبوط محافظ اور صیہونی حکومت کی توسیع پسندی کے مقابلے میں سب سے مضبوط ڈھال ہے۔

سحرنیوز/ایران: مہر خبررساں ایجنسی کی رپورٹ کے مطابق، رہبر معظم انقلاب اسلامی آیت اللہ العظمی خامنہ ای نے حزب اللہ لبنان کی ایگزیکٹیو کمیٹی کے سربراہ سید ہاشم صفی الدین کی شہادت کی مناسبت سے اپنے پیغام میں ان کے لواحقین اور مزاحمتی ساتھیوں کو تعزیت پیش کی ہے۔
بسم اللہ الرحمن الرحیم
شجاع، فداکار و مجاہد سید، جناب سید ہاشم صفی الدین رضوان اللہ علیہ مزاحمت کے شہیدوں کی صف میں شامل ہوگئے اور ایک اور درخشندہ ستارے نے قدس شریف کی راہ میں جہاد کے آسمان کو مزین کردیا۔ وہ حزب اللہ کی سب سے بڑی اور نمایاں شخصیات میں سے ایک اور جناب سید حسن نصر اللہ کے ساتھی اور مددگار تھے۔ ان جیسے رہنماؤں کی تدبیر اور شجاعت کی وجہ سے ہی حزب اللہ ایک بار پھر لبنان کو تقسیم و انتشار کے خطرے سے محفوظ رکھنے اور غاصب حکومت کی سازش کو، جس کی سفاک و ظالم فوج کبھی کبھی بیروت تک کو پامال کر دیتی تھی، ناکام بنانے میں کامیاب رہی۔ ان کی اور حزب اللہ کے دیگر کمانڈروں اور مجاہدوں کی شجاعت اور فداکاری ہی تھی جس نے لبنان کو جنوبی لیطانی، صور اور اس علاقے کے دیگر شہروں پر غاصبانہ قبضے اور انہیں مقبوضہ فلسطین میں شامل کرنے کے خطرے سے بچایا اور حزب اللہ کی گرانقدر جان، مال اور عزت کو اس ملک کی ارضی سالمیت کی حفاظت کی راہ میں میدان میں لے آئی اور جارح اور مجرم صیہونی حکومت کو ہزیمت سے دوچار کر دیا۔
آج نصراللہ اور صفی الدین جیسے رہنما بظاہر اس دنیا میں نہیں ہیں لیکن ان کی روح اور قیادت میدان میں موجود ہے اور لبنان اور اس کے نہتے عوام کا دفاع کر رہی ہے۔ آج بھی حزب اللہ، لبنان کا دفاع کرنے والا سب سے طاقتور عنصر اور صیہونی حکومت کی لالچی پالیسیوں کے مقابل سب سے مضبوط ڈھال ہے جس نے بہت پہلے سے لبنان کی تقسیم کو ہدف بنا رکھا تھا۔
میں اپنے عزیز سید جناب صفی الدین کی شہادت پر ان کے محترم اہل خانہ، اعزا اور تمام مزاحمتی محاذوں پر لڑنے والے ان کے ساتھیوں کی خدمت میں  تعزیت پیش کرتا ہوں۔
سید علی خامنہ ای
24 اکتوبر 2024