مذاکرات دوبارہ شروع کرنے کے لئے امریکی پیغام کی خبر؛ ایران کے نائب وزیر خارجہ
ایران کے نائب وزیر خارجہ نے کہا ہے کہ حالیہ دنوں کے دوران امریکی فریق کی جانب سے اسلامی جمہوریہ ایران کو پیغامات موصول ہوئے ہیں جن میں مذاکرات کی میز پر واپسی کی خواہش کا اظہار کیا گیا ہے۔
سحرنیوز/ایران: ایرانی وزارت خارجہ کے پولیٹیکل اینڈ انٹرنیشنل اسٹیڈیز سینٹر کے سربراہ اور نائب وزیر خارجہ سعید خطیب زادہ نے کہا ہے کہ حالیہ دنوں کے دوران امریکی فریق کی جانب سے اسلامی جمہوریہ ایران کو پیغامات موصول ہوئے ہیں جن میں مذاکرات کی میز پر واپسی کی خواہش کا اظہار کیا گیا ہے۔ خطیبزاده نے ایک گفتگو کے دوران کہا کہ گزشتہ دنوں میں امریکیوں کی طرف سے ہمیں ایسے پیغامات موصول ہوئے ہیں جن میں انہوں نے مذاکرات میں واپسی کے لیے آمادگی ظاہر کی ہے۔ انہوں نے مزید کہا کہ ایران کی سرزمین پر حملے اور جارحیت کے بعد اعتماد کی فضا بری طرح متاثر ہوئی ہے، اور دوبارہ گفتگو کے لے اس اعتماد کی بحالی کی ضرورت ہے۔
ایرانی سفارتکار نے زور دے کر کہا کہ مذاکرات سفارتکاری کے اہم ترین اجزاء میں سے ہیں اور وقت آنے پر اگر ضروری سمجھا گیا تو اسلامی جمہوریہ ایران کی اعلیٰ قیادت اور سفارتی ادارے اس حوالے سے مناسب فیصلہ کریں گے۔
