SAHAR

  ہمارے نمائندے کے مطابق عراقی پارلیمنٹ کے ہنگامی اجلاس میں ایران کی قدس فورس کے کمانڈر جنرل قاسم سلیمانی اور عراق کی عوامی رضاکار فورس الحشدالشعبی کے ڈپٹی کمانڈر ابومہدی المہندس کو قتل کرنے کے لیے عراقی سرزمین کے استعمال پر شدید غم و غصے کا اظہار کرتے ہوئے، امریکی فوجیوں کے انخلا سے متعلق مسودہ قانون کی منظوری دی گئی۔

عراقی پارلیمنٹ کا اجلاس مردہ باد امریکہ اور مردہ باد اسرائیل کے نعروں سے شروع ہوا۔

عراق کے کیرٹیکر وزیراعظم عادل عبدالمہدی نے اجلاس سے خطاب کرتے ہوئے اراکین پارلیمنٹ سے مطالبہ کیا کہ وہ ملک سے امریکی فوجیوں کے فوری انخلا کے حق میں ووٹ دیں۔انہوں نے عوامی رضاکار فورس حشدالشعبی کو ملک کی سیکورٹی سسٹم کا حصہ قرار دیتے ہوئے، اس فورس کے اہداف پر امریکی حملوں کی شدید الفاظ میں مذمت کی۔

 

وزیراعظم عادل عبدالمہدی نے دہشتگردی کے خلاف جنگ میں ایران کے تعاون کی قدردانی کرتے ہوئے کہا کہ اس عرصے کے دوران ایران نے ہمارے ملک میں داعش کے خلاف جنگ میں موثر کردار ادا کیا ہے اور ہمارے عوام اور سیکورٹی اداروں کی بھرپور مدد کی ہے۔