القدس بٹالین: غزہ کی زمینی جنگ میں صیہونی فوج کا مرکاوا ٹینک تباہ
جہاد اسلامی فلسطین کے فوجی بازو القدس بٹالین نے اعلان کیا ہے کہ غزہ کے شمال میں واقع جبالیا کیمپ کے علاقے القصاصیب میں غاصب صیہونی حکومت کے مرکاوا ٹینک کو نشانہ بنایا گیا۔
سحرنیوز/عالم اسلام: جبالیا کیمپ کے علاقے القصاصیب میں غاصب صیہونی حکومت کے مرکاوا ٹینک کو صیہونی جارحیت کے جواب میں نشانہ بنایا گيا۔ القدس بٹالین نے اسی طرح اعلان کیا ہے کہ مشرقی خان یونس میں ابو ہریرہ مسجد کے اطراف میں صیہونی حکومت کے جنگي سازوسامان کو بھی نشانہ بنایا گیا۔ دوسری جانب فلسطین کی اسلامی مزاحمتی تحریک حماس کے فوجی بازو القسام بریگیڈ نے اعلان کیا ہے کہ غزہ کے جنوب میں واقع خان یونس کے علاقے المحطہ میں صیہونی فوج کے ایک ٹینک کو یاسین ایک سو پانچ قسم کے میزائل سے نشانہ بنایا گیا۔ غزہ کے شمال میں واقع بیت حانون میں بھی فلسطینی مجاہدین اور غاصب صیہونی حکومت کے جارح فوجیوں کے درمیان شدید جھڑپیں جاری ہیں۔ القسام بریگیڈ نے غزہ کے جنوب میں واقع مشرقی خان یونس میں صیہونی فوج کے ایک پیدل دستے کو بھی حملے کا نشانہ بنایا جس میں صیہونی فوج کے اس دستے کو خاصا نقصان پہنچا۔ جس کے بعد دوبدو لڑائی ہونے لگی اور اس لڑائي میں بھی کئی صیہونی فوجی ہلاک و زخمی ہو گئے۔ ادھر ابو علی مصطفی بٹالین نے اعلان کیا ہے کہ غزہ کے شیخ رضوان علاقے میں شدید جھڑپوں کا سلسلہ جاری ہے جہاں صیہونی فوج کی متعدد بکتر بند گاڑیوں کو آر پی جی سے نشانہ بنایا گیا۔
