یمن کے مختلف صوبوں کے عوام نے فلسطین کے مظلوم عوام کی حمایت جاری رکھتے ہوئے ایک بار پھر ملین مارچ کیا ہے۔

سحرنیوز/عالم اسلام: المیادین ٹی وی کی رپورٹ کے مطابق یمن کے دارالحکومت صنعا کے ساتھ ہی اس ملک کے چودہ صوبوں کے یمنی شہریوں نے غزہ کے مظلوم باشندوں کی حمایت اور امریکہ و صیہونی حکومت کے خلاف زبردست مظاہرے کئے۔
یمنی عوام نے اپنی تاریخی ریلی اور مظاہرے کے اختتام پر ایک بیان جاری کیا جس میں ملت فلسطین کی حمایت جاری رکھنے پر تاکید کی۔ یمن میں صیہونیت مخالف ملین مارچ کے شرکاء نے زور دے کر کہا کہ غزہ میں جو کچھ ہو رہا ہے اس پر خاموشی اور غیرذمہ دارانہ رویہ صیہونی حکومت کے جرائم میں شریک ہونے کے مترادف ہے۔
یمن کے عوام نے زور دے کر کہا ہے کہ یمن پر امریکہ و برطانیہ کے کسی بھی طرح کے زمینی حملے کا ہزاروں یمنی جیالے ڈٹ کر مقابلہ کریں گے اور یمن پر حملہ، اس کی مسلح افواج کی پیش قدمی پر منتج ہوگا۔ یمن کے عوام، گذشتہ ہفتوں میں بھی غزہ میں فلسطینی عوام کی حمایت ميں بڑے پیمانے پر مظاہرے کرتے رہے ہيں۔