حماس اس بار 4 یرغمالیوں کی لاشیں اسرائیل کے حوالے کرے گی
حماس کی جانب سے رواں ہفتے 4 اسرائیلی یرغمالیوں کی لاشیں اسرائیل کے حوالے کی جائیں گی۔
سحر نیوز/ عالم اسلام: فلسطین کی اسلامی مزاحمتی تنظیم حماس جمعرات کو ریڈ کراس کے ذریعے یرغمالیوں کی لاشیں اسرائیلی حکام کے حوالے کرے گی، جبکہ ہفتے کو مزید 3 یرغمالیوں کو رہا کیا جائے گا۔ تاہم اسرائیل نے حماس سے درخواست کی ہے کہ 3 کے بجائے 6 قیدیوں کو رہا کرے۔
رپورٹ کے مطابق یہ پہلا موقع ہوگا جب جنگ بندی کے بعد حماس یرغمالیوں کی لاشیں واپس کرے گا ۔ ان میں وہ یرغمالی بھی شامل ہیں جو دورانِ جنگ بیماریوں یا اسرائیلی بمباری کے نتیجے میں ہلاک ہوئے۔
اسرائیلی میڈیا کے مطابق 27 فروری کو مزید 4 یرغمالیوں کی لاشیں حوالے کی جائیں گی۔ بدلے میں اسرائیل 7 اکتوبر کے بعد غزہ سے گرفتار کی گئی تمام خواتین اور بچوں کو رہا کرے گا۔
یہ تبادلہ اسرائیل اور حماس کے درمیان قیدیوں کی رہائی کے ایک وسیع معاہدے کا حصہ ہے۔
واضح رہے کہ 3 روز قبل قیدیوں کے رہائی کے تبادلے میں اسرائیل نے حماس کی جانب سے مزید 3 یرغمالیوں کی رہائی کے بدلے 369 فلسطینی قیدیوں کو رہا کیا تھا۔
