حزب اللہ لبنان کے سربراہ شیخ نعیم قاسم نے زور دیا ہے کہ اسلامی مزاحمت اپنی آزادی بخش جدوجہد جاری رکھے گی اور وہ صہیونی حکومت کے قبضے، غیر قانونی بستیوں کی تعمیر اور تعلقات کو معمول پر لانے کو سختی سے مسترد کرتی ہے۔
سحر نیوز/ عالم اسلام: مجلہ "اقتدار" کو دیے گئے انٹرویو میں انہوں نے کہا کہ حزب اللہ، تحریک امل اور دیگر اتحادیوں کے ساتھ مل کر لبنان کے اندر ایک موثر اور فیصلہ کن قوت ہے جو ہر سطح پر اپنا کردار ادا کر رہی ہے۔ شیخ نعیم قاسم نے کہا کہ ہم اپنے قومی مشن کے تحت لبنان کی خودمختاری اور آزادی کا دفاع جاری رکھیں گے۔
انہوں نے صیہونی حکومت کی جارحیت کے نتیجے میں پیدا ہونے والی تباہی کی جانب اشارہ کرتے ہوئے کہا کہ ہم قومی جماعتوں کے ساتھ ملکر ملک کی تعمیر نو کو یقینی بنائیں گے۔
انہوں نے واضح کیا کہ حزب اللہ لبنان آزادی کے اپنے مشن کو جاری رکھتے ہوئے ہے اور ہر طرح کے قبضے اور اسرائیل کے ساتھ تعلقات معمول پر لانے کی مخالفت کرے گی۔
شیخ نعیم قاسم نے کہا کہ ہمارا خطہ امریکی سامراج اور اس کے جرائم پیشہ آلہ کار اسرائیل کے مسلسل نشانے پر ہے جس کا مقصد اپنی توسیع پسندانہ عزائم کو آگے بڑھانا اور یہاں کے اصل باشندوں کو جبری جلا وطن کرنا ہے۔ انہوں نے یہ بات زور دے کر کہی کہ صیہونی حکومت اور بعض عرب حکومتوں کے درمیان تعلقات کو معمول پر لانے کا مقصد مسئلہ فلسطین کو ہمیشہ کےلئےدفن کرنا ہے اور لبنان بھی ان سازشوں کا ہدف ہے تاکہ یہاں کی مزاحمتی قوتوں کو کمزور کیا جا سکے۔
