SAHAR

یمن کی اعلی انقلابی کمیٹی کے سربراہ نے یمن پر سعودی عرب کے حملے کا پہلا مقصد دہشت گرد گروہوں کی حمایت قرار دیا ہے

لبنانی روزنامہ الاخبار کی سائٹ کے مطابق یمن کی عوامی انقلابی تحریک کے سربراہ محمد علی الحوثی نے انسانی امور میں اقوام متحدہ کے کوارڈی نیٹر جان گانگ سے ملاقات میں کہا کہ سعودی عرب ، یمن پر حملے میں عام شہریوں، ، بنیادی تنصیبات، گھروں اور اسپتالوں کو نشانہ بنا رہا ہے اور ان حملوں کا مقصد دہشت گرد گروہوں کی حمایت و مدد کرنا ہے-

محمد علی الحوثی نے مزید کہا کہ یمن کی فوج اور عوامی رضاکار فورس اپنی تمام کارروائیوں میں دہشت گردوں کو نشانہ بناتی ہے اور یہی چیز سعودی عرب کے سیخ پا ہونے کا سبب ہے اور اسی وجہ سے وہ یمن کے شہروں کو تباہ و برباد کر رہا ہے-

یمن کی عوامی انقلابی تحریک کے سربراہ محمد علی الحوثی نے اقوام متحدہ کے کوارڈی نیٹر سے مطالبہ کیا کہ وہ یمن کے شہروں کا قریب سے دورہ کریں تاکہ سعودی عرب کے حملوں سے ہونے والی تباہی کو سمجھ سکیں- سعودی عرب، امریکہ اور اپنے بعض عرب اتحادیوں کی مدد سے برے پیمانے پر یمن پر وحشیانہ حملے کر رہا ہے تاکہ اس ملک کے مفرور و مستعفی صدر منصور ہادی کو اقتدار میں واپس لا سکے-

یمن پر سعودی عرب اور اس کے اتحادیوں کے حملوں میں اب تک ہزاروں بے گناہ شہری ہلاک اور دسیوں ہزار زخمی ہو چکے ہیں-