ایٹمی جنگ کا خطرہ حقیقی، پاکستان کے وزير دفاع
پاکستان کے وزیر دفاع خواجہ آصف کا کہنا ہے کہ اگر ہندوستان نے جنگ کو بڑھاوا دیا تو نیوکلیئر جنگ ہو سکتی ہے۔
سحرنیوز/پاکستان: انہوں نے یہ بات پاکستان کے جیو نیوز‘ چینل سے خصوصی گفتگو کرتے ہوئے کہی ہے۔
ان کا کہنا تھا کہ نیوکلیئر جنگ کی صورت میں ساری ذمے داری ہندوستان پرعائد ہو گی۔
خواجہ آصف کا کہنا تھا کہ حالات کو خراب کیا گیا تو نیوکلیئر جنگ کا خطرہ پیدا ہو سکتا ہے، ماضی میں ہندوستان کے ساتھ نیوکلیئر جنگ کا خدشہ پیدا ہو چکا ہے، خطے میں ایک بار پھر اسٹریٹیجک اسٹینڈ آف کی کیفیت بن سکتی ہے، پاکستان ماضی میں ایسے مراحل سے گزر چکا ہے۔
ان کا مزید کہنا تھا کہ ہندوستان اس وقت خود ایک بڑے داخلی بحران سے دو چار ہے، ایٹمی جنگ کا خطرہ حقیقت ہے، جسے نظر انداز نہیں کیا جا سکتا۔
اس سے پہلے اپنے ایک بیان میں انہوں نے کہا تھا کہ اگر ہندوستان جارحیت بند کر دے تو اسلام آباد دہلی کے ساتھ مذاکرات کے لیے تیار ہے۔ انہوں کا کہنا تھا کہ ہم حالات کو مزید کشیدہ نہیں کرنا چاہتے لیکن اگر ہندوستان کی طرف سے دشمنی جاری رہی تو ہمیں جواب دینا پڑے گا۔
