پاکستان؛ فوجی چیک پوسٹ پر حملہ، ایک فوجی جاں بحق
Jun ۰۳, ۲۰۲۲ ۱۰:۱۹ Asia/Tehran
پاکستان کے صوبہ خیبر پختونخوا کے علاقے شمالی وزیرستان میں دہشت گردوں نے چیک پوسٹ پر حملہ کیا جس کے نتیجے میں ایک فوجی اہلکار جاں بحق ہوگیا۔
سحر نیوز پاکستان: پاکستانی فوج کے شعبۂ تعلقات عامہ (آئی ایس پی آر) کے مطابق ایک اور دو جون کی درمیانی شب دہشت گردوں نے شمالی وزیرستان کے علاقے دتہ خیل میں فوجی چیک پوسٹ پر بھاری ہتھیاروں سے حملہ کیا جسے فوجی اہلکاروں نے ناکام بنا دیا تاہم دہشت گردوں کا مقابلہ کرتے ہوئے28 سالہ سپاہی حامد علی جاں بحق ہو گیا۔
پاکستانی فوج کے شعبہ تعلقات عامہ کے ڈائریکٹر جنرل میجر جنرل بابر افتخار کا کہنا ہے کہ فوج دہشت گردوں کے خاتمے کے لیے پُرعزم ہے اور فوج کی جانب سے دہشتگردوں کے خلاف علاقے میں سرچ آپریشن جاری ہے۔
