کراچی: پولیس ہیڈ کوارٹرمیں دھماکہ 4 اہلکار جاں بحق و زخمی
Aug ۰۳, ۲۰۲۲ ۱۲:۱۴ Asia/Tehran
پاکستان کے صنعتی شہر کراچی کے علاقے گارڈن میں واقع پولیس ہیڈ کوارٹر میں دستی بم کے دھماکے میں 2 اہلکار جاں بحق اور 2 زخمی ہو گئے۔
کراچی پولیس کے مطابق دھماکا ہیڈکوارٹر گارڈن کے اسلحہ خانے میں ہوا۔ جاں بحق ہونے والے 2 اہل کاروں کی شناخت 45 سالہ کانسٹیبل صابر اور 40 سالہ شہزاد کے نام سے ہوئی۔ جبکہ دونوں زخمی اہل کاروں کی حالت تشویش ناک ہے۔
ڈی آئی جی سی ٹی ڈی آصف اعجاز شیخ کا کہنا ہے کہ زخمی سب انسپکٹر اور سپاہی دستی بم اسلحہ خانے سے باہر لائے، ابتدائی اطلاعات کے مطابق اہلکار دستی بم چیک کرنے کے لیے باہر لائے تھے۔
آصف اعجاز شیخ نے کہا کہ اس دوران پن نکالنے سے دستی بم پھٹ گیا، دستی بم پھٹنے سے 2 اہلکار جاں بحق اور 2 زخمی ہوئے ہیں۔
ڈی آئی جی سی ٹی ڈی کا یہ بھی کہنا ہے کہ اہلکار دستی بم باہر کیوں لائے تھے، اس حوالے سے تحقیقات جاری ہیں۔
