صوبہ خیبرپختونخوا کے علاقے ڈیرہ اسمعٰیل خان میں تھانے پر دہشت گردوں کا حملہ، 10 پولیس اہلکار جاں بحق
پاکستان کے صوبہ خیبرپختونخوا کے علاقے ڈیرہ اسمعٰیل خان میں تھانہ چودہوان پر دہشت گردوں نے حملہ کردیا جس کے نتیجے میں 10 پولیس اہلکار جاں حق اور 6 دیگر زخمی ہوگئے۔
سحرنیوز/پاکستان: پاکستان کے میڈیا رپورٹوں میں بتایا گیا ہے کہ رات 3 بجے کے قریب دہشت گردوں نے بھاری ہتھیاروں سے تھانہ چودہوان پر حملہ کیا۔ پولیس کے مطابق پولیس اہلکاروں اور دہشت گردوں کے درمیان ڈھائی گھنٹے تک فائرنگ کا تبادلہ جاری رہا۔
دہشت گردوں کی فائرنگ سے 10 پولیس اہلکار جاں بحق جبکہ 6 اہلکار زخمی ہوگئے۔
یہ دہشت گردانہ حملہ پاکستان کے عام انتخابات سے صرف چار روز قبل ہوا ہے۔ حالیہ ہفتوں کے دوران پاکستان میں اور خاص طور پر خیبر پختونخوا اور بلوچستان میں دہشت گردی کے واقعات میں نمایاں اضافہ ہوا ہے۔ تاحال کسی فرد یا گروہ نے اس حملے کی ذمہ داری قبول نہیں کی ہے البتہ عام طور سے دہشت گرد گروہ ٹی ٹی پی صوبہ خیبرپختونخوا میں ایسے حملوں کی ذمہ داری قبول کرتا رہا ہے۔
