پارا چنار میں جھڑپوں کا سلسلہ جاری، 18 کی موت 30 زخمی
پاکستان کے قبائلی علاقے پارا چنار میں تازہ جھڑپوں میں کم سے کم اٹھارہ افراد کے مارے جانے اور تیس کے زخمی ہونے کی خبر ہے۔
سحر نیوز/ پاکستان: پاکستانی میڈیا ذرائع کے مطابق پاکستان کے صوبہ خیبر پختونخوا میں پارا چنار کے شیعہ مسلمانوں کی بسوں پر تکفیری دہشت گردوں کے جمعرات کے حملوں کے بعد کشیدگی پورے علاقے میں پھیل گئی ہے۔ ضلع کرم میں پولیس کا کہنا ہے کہ جمعرات کے دہشت گردانہ حملوں کے بعد شروع ہونے والی لڑائی کا سلسلہ بدستور جاری ہے۔
اس رپورٹ کے مطابق دونوں فریقوں نے ایک دوسرے کے خلاف بھاری اور خود کار اسلحے استعمال کئے ہيں۔ پولیس کے مطابق تازہ جھڑپوں میں کم سے کم اٹھارہ افراد مارے جاچکے ہیں اور تیس سے زائد زخمی ہوئے ہیں جبکہ بھاری اسلحے کے استعمال کے نتیجے میں گھروں اور دکانوں کو بھی نقصان پہنچا ہے۔ تازہ رپورٹوں میں بتایا گیا ہے کہ خیبر پختونخوا کی حکومت نے حالات کا جائزہ لینے کے لئے علاقے میں ایک وفد روانہ کیا تھا لیکن اس وفد کے ہیلی کاپٹر پر بھی فائرنگ کی گئی جس کےبعد یہ وفد معائنہ کئے بغیر واپس آگیا۔
یاد رہے کہ گزشتہ جمعرات کو پارا چنار کے شیعہ مسلمانوں کی دو بسوں پر تکفیری دہشت گردوں کے حملے میں سو سے زائد بے گناہ شہید اور زخمی ہوگئے تھے۔ اس دہشت گردانہ حملے میں شہید اور زخمی ہونے والوں میں بڑی تعداد خواتین اور بچوں کی تھی۔
