ایران و پاکستان کے وزرائے خارجہ کی قاہرہ میں ملاقات
ایران اور پاکستان کے وزرائے خارجہ نے قاہرہ میں ڈی-8 سربراہی اجلاس کے موقع پر ملاقات کی ہے۔
سحرنیوز/پاکستان: موصولہ رپورٹ کے مطابق ایران کے وزیر خارجہ سید عباس عراقچی نے پاکستان کے وزیر خارجہ محمد اسحاق ڈار سے ہونے والی اس ملاقات میں صیہونی حکومت کی جارحیت کی طرف اشارہ کرتے ہوئے کہا کہ بدقسمتی سے امریکہ اور بعض مغربی ممالک کی حمایت سے صیہونی حکومت شام کے دفاعی اور اقتصادی ڈھانچے کو تباہ کر رہی ہے اور غزہ اور لبنان میں اپنے جرائم کو جاری رکھے ہوئے ہے۔ ایرانی وزیر خارجہ نے کہا کہ شام کی موجودہ صورت حال اسلامی ممالک کو تقسیم کرنے کے امریکی اور صیہونی منصوبے کا نتیجہ اور دہشت گرد گروہ داعش کے مذموم رجحان کے دوبارہ پھیلنے کی بنیاد ہے۔
اس ملاقات میں پاکستان کے وزیر خارجہ اسحاق ڈار نے شام سمیت خطے کی موجودہ صورت حال کے حوالے سے ملک کے موقف کی وضاحت کرتے ہوئے صیہونی حکومت کی جارحیت کی مذمت کی۔اسحاق ڈار نے فلسطین، لبنان اور شام کے حوالے سے اسلامی ممالک کے درمیان بات چیت کے سلسلے میں تعاون کو مضبوط بنانے پر زور دیا۔
فریقین نے عالم اسلام کے مشترکہ مفادات کے دفاع کے لیے اہم مسلم ممالک بالخصوص ایران اور پاکستان کے درمیان گہرے تعاون اور ہم آہنگی کی ضرورت پر بھی زور دیا۔
