کراچی ؛ سانحہ گل پلازہ میں جاں بحق ہونے والوں کی تعداد اکسٹھ تک جا پہنچی

Jan ۲۱, ۲۰۲۶ ۲۰:۱۴ Asia/Tehran

پاکستان کے سب سے بڑے صنعتی شہر کراچی کے سانحہ گل پلازہ میں آگ سے تباہ ہونے والےگل پلازہ میں سرچ آپریشن کے دوران مزید تیس لاشیں ملی ہیں جس کے بعد جاں بحق افراد کی تعداد اکسٹھ تک جا پہنچی ہے۔

سحرنیوز/پاکستان: رپورٹ کے مطابق دکانداروں نے میزنائن فلور پر لوگوں کی موجودگی کی نشاندہی کی تھی، تمام تیس لاشیں ایک کراکری کی دکان سے ملی ہیں۔

ڈی آئی جی ساؤتھ اسد رضا کے مطابق ملبہ ہٹانےکا کام روک دیا گیا ہے، پہلے لاشیں نکالی جارہی ہیں۔ گل پلازہ میں آگ لگنےکے بعد لوگوں نے خود کو بچانےکے لیے دکان میں بندکرلیا تھا، ان افراد کی آخری موبائل لوکیشن بھی اسی جگہ کی آئی تھی۔ پولیس سرجن کے مطابق آج ملبے سے نکالی گئی مزید باقیات کی جانچ کا عمل بھی جاری ہے تاہم مزید اموات کا اندیشہ ہے۔

ہمیں فالو کریں:

قبل ازیں صحافیوں سے گفتگو میں پولیس سرجن نے بتایا تھا کہ مجموعی طور پر اٹھائیس لاشیں موصول ہوئیں، ابتدائی طور پر چھے لاشیں مکمل اور قابل شناخت تھیں، باقی لاشوں کے ڈی این اے سیمپلز سندھ فرانزک ڈی این اے لیب بھجوا دیے گئے۔

واضح رہے کہ ریسکیو اہلکار چالیس گھنٹوں کے بعد گل پلازہ کی عمارت میں داخل ہوئے اور لاپتا افراد کی تلاش میںآپریشن شروع کیا تاہم کام کے دوران بھی عمارت کے مختلف حصوں سےآگ بھڑک اٹھتی تھی جس سے ریسکیو کا کام متاثر ہوا۔