حماس کے ساتھ قیدیوں کا تبادلہ مکمل کرنے کے حق میں مظاہرہ کرنے والے صہیونیوں اور پولیس میں جھڑپیں
مقبوضہ فلسطین کے شہر تل ابیب میں حماس کے ساتھ قیدیوں کا تبادلہ مکمل کرنے کے حق میں مظاہرہ کرنے والے صہیونیوں اور پولیس کے درمیان جھڑپیں ہوئی ہیں۔
سحر نیوز/ دنیا: رپورٹ کے مطابق، حماس کے ساتھ قیدیوں کے تبادلے میں تعطل آنے کے بعد تل ابیب میں صہیونی آبادکاروں نے نیتن یاہو حکومت کے خلاف شدید احتجاج کیا اور اسرائیل پر جنگ بندی اور قیدیوں کے تبادلے کے معاہدے میں رکاوٹ ڈالنے کا الزام عائد کیا۔
ذرائع کے مطابق اسرائیلی پولیس نے مظاہرین پر حملہ کیا جس کے نتیجے میں جھڑپیں شروع ہوئیں۔ مشتعل مظاہرین نے تل ابیب کی ایالون شاہراہ کو بند کردیا اور معاہدے کے تمام مراحل کو مکمل طور پر نافذ کرنے کا مطالبہ کیا۔
دوسری جانب حماس کے عسکری بازو عزالدین القسام بریگیڈ کے ترجمان ابوعبیدہ نے اعلان کیا ہے کہ اسرائیل کی جانب سے غزہ میں جنگ بندی کے معاہدے کی شرائط پرعمل نہ کرنے کی وجہ سے کچھ صہیونی قیدیوں کی رہائی کوجو آئندہ ہفتے ہونا تھی، مؤخر کر دیا گیا ہے۔
