شمالی یورپ بھی، امریکی مصنوعات کے بائیکاٹ کے میدان میں اتر آیا
ناروے کے ہالٹ باک بنکرز کمپنی نے اعلان کیا ہے کہ آج کے بعد امریکی بحری بیڑے کو ایندھن فراہم نہیں کرے گی۔
سحرنیوز/دنیا: فرانس کے لومونڈ اخبار کے مطابق، اس نارویجیئن کمپنی نے اپنے فیس بک پیج پر اعلان کیا ہے کہ امریکی بحریہ کو ایندھن کی فراہمی کا سلسلہ فوری طور پر بند کیا جا رہا ہے۔ قابل ذکر ہے کہ ہالٹ باک بنکرز Haltbakk Bunkers ناروے کی بندرگاہوں پر جہازوں کو خدمات فراہم کرنے والی سب سے بڑی کمپنی ہے۔ مذکورہ کمپنی کا بیان ڈونلڈ ٹرمپ اور ولودیمیر زیلینسکی کے درمیان بحث کے محض چند گھنٹے بعد جاری ہوا ہے۔ لومونڈ اخبار کی رپورٹ کے مطابق، نارڈک ممالک میں امریکی مصنوعات کے بائیکاٹ کی تحریک میں شدت آرہی ہے اور گزشتہ چند ہفتوں کے دوران فیس بک سمیت سوشل میڈیا پر ایسے گروپ تشکیل دیے جا رہے ہیں جس میں صارفین سے امریکی مصنوعات اور برانڈز کو بلیک لسٹ میں لانے اور انہیں بائیکاٹ کرنے کی اپیل کی جا رہی ہے۔ صارفین کا کہنا ہے کہ یورپ میں اس تحریک کو پھیلا کر امریکی کمپنیوں کو ہلا کر رکھ دیا جائے گا۔
