جی 20: ارب پتیوں کی کمائی دنیا سے غربت مٹانے کے لئے کافی، پھر بھی غربت کی لکیر سے نیچے افراد کی تعداد 4 ارب
اطلاعات کے مطابق دنیا کی بڑی معیشتوں سے متعلق ارب پتی افراد نے گزشتہ سال اتنی کمائی کی ہے کہ یہ رقم پوری دنیا سے غربت کا خاتمہ کرنے کے لئے کافی ہے۔
سحرنیوز/دنیا: عالمی مہم تنظیم آکسفیم کی رپورٹ میں بتایا گیا ہے کہ دنیا کی بڑی معیشتوں سے تعلق رکھنے والے ارب پتی افراد نے گزشتہ سال 2 کھرب 20 کروڑ ڈالر کی کمائی کی ہے جو دنیا بھر سے غربت ختم کرنے کے لئےکافی ہے۔ بتایا جاتا ہے کہ دنیا میں تقریباً 4 ارب افراد غرب کی لکیر سے نیچے زندگی گزار رہے ہیں۔
آکسفیم نے بتایا کہ فوربز کی فہرست کے اعداد و شمار کے مطابق دنیا میں 3 ارب 80 کروڑ افراد غربت کی لکیر سے نیچے زندگی گزار رہے ہیں، انہیں اوپر لانے کے لئےسالانہ 1 کھرب 65 ارب ڈالر درکار ہیں۔ اس طرح اگر صرف گروپ 20 ممالک کے ارب پتیوں کی محض ایک سال کی کمائی (2 کھرب 20 کروڑ ڈالر) غربت کی لکیر سے نیچے رہنے والے افراد پر خرچ کردی جائے تب بھی ان کے پاس اربوں ڈالر کی رقم باقی بچے گی۔
دریں اثنا آکسفیم کے ایگزیکٹو ڈائریکٹر امیتابھ بیہر نے اپنے بیان میں کہا ہے کہ اگر جنوبی افریقہ کا جی 20 عدم مساوات پر ایک نیا انٹرنیشنل پینل قائم کرتا ہے تو یہ عدم مساوات کے ہنگامی بحران سے نمٹنے کے لئے ایک بہت بڑا قدم ہوگا۔
آکسفیم نے مطالبہ کیا ہے کہ دنیا کے امیر طبقے سے منصفانہ ٹیکس وصول کیا جائے تاکہ غربت کے خاتمے اور ماحولیاتی تباہی کے خلاف لڑائی میں مدد مل سکے۔
تنظیم نے خاص طور پر امریکہ کا حوالہ دیتے ہوئے کہا کہ وہ تباہ کن پالیسیوں کو فروغ دے رہا ہے، جن میں غیر ذمہ دارانہ ٹیرف اور زندگی بچانے والی امداد میں کٹوتیاں شامل ہیں، جو امیر اور غریب کے درمیان عدم مساوات میں اضافہ کرتی ہیں۔
قرضوں کے بحران کے بارے میں آکسفیم نے کہا کہ دنیا کے 3 ارب 40 کروڑ افراد ایسے ممالک میں رہتے ہیں جو تعلیم یا صحت کے مقابلے میں قرضوں پر سود کی ادائیگی پر زیادہ رقم خرچ کرتے ہیں۔
واضح رہے کہ جی 20 میں شامل ممالک مجموعی طور پر دنیا کی 85 فیصد معیشت اور دو تہائی عالمی آبادی کی نمائندگی کرتے ہیں۔
