کشمیرمیں 2 عسکریت پسند جاں بحق، ڈرون تباہ
سوپور انکاؤنٹر میں 2 عسکریت پسند جاں بحق ہو گئے۔
ہندوستان کے زیر انتظام جموں وکشمیر کے ضلع بارہمولہ کے سوپور علاقے میں جمعرات کی رات سے جاری انکاؤنٹرمیں 2 عسکریت پسند جاں بحق ہوگئے ہیں۔
کشمیر زون پولیس کے انسپکٹر جنرل وجے کمار نے مارے جانے والے عسکریت پسندوں میں سے ایک کی شناخت فیاض وار کے طور پر کی ہے۔
وجے کمار نے کہا کہ سوپور تصادم کے دوران سکیورٹی فورسز اور عام شہریوں کا کوئی جانی نقصان نہیں ہوا ہے۔
اس دوران آرمی کی 22 آر آر ، ایس او جی سوپور اور سی آر پی ایف 179 ، 177 اور 92 بٹالین کی مشترکہ ٹیم نے وارپورہ میں گھر۔ گھر تلاشی لی اور علاقے کے تمام داخلی اور خارجی راستوں کو سیل کردیا۔
کشمیر زون پولیس نے کہا ہے کہ اس وقت بھی علاقے میں سرچ آپریشن جاری ہے۔
دوسری جانب اکھنور سیکٹر ( Akhnoor Sector) میں ایک ڈرون (Drone) کو مار گرایا گیا۔ جموں وکشمیر پولیس کی طرف سے کی گئی فائرنگ کے بعد ڈرون زمین پر گر پڑا۔ ڈرون سے پولیس نے پانچ کلو گرام IED برآمد کرنے کا بھی دعوی کیا ہے۔
