ہندوستان، مندر میں ٹرک در آیا، متعدد ہلاک و زخمی
ہندوستان کی ریاست بہار میں تیز رفتار ٹرک نے مندر میں گھس کر آٹھ کو ہلاک اور معتدد کو زخمی کر دیا۔
سحر نیوز/ایران: ہندوتانی ذرائع کے مطابق یہ حادثہ گزشتہ شب ریاست بہار کے ضلع ویشالی کے نیا گاؤں ٹولہ نامی علاقے میں پیش آیا۔ بتایا جاتا ہے کہ ایک تیز رفتار ٹرک حاجی پور مہنار ہائی وے کے کنارے بنے ایک مندر میں اچانک گھس آیا جہاں لوگوں کی ایک تعداد پوجا پاٹھ کے لئے موجود تھی۔
بعض ذرائع کے مطابق مرنے والوں کی تعداد ۱۲ ہے جن میں سات بچے اور خواتین بھی شامل ہیں۔ حادثے میں متعدد زخمی بھی ہوئے ہیں جنہیں حاجی پور کے صدر ہسپتال میں منتقل کیا گیا ہے۔ بعض زخمیوں کی حالت نازک بھی بتائی جاتی ہے۔ اس حادثے میں ٹرک ڈرائیور بھی اپنی جان سے ہاتھ دھو بیٹھا۔
حادثے پر ملک کے وزیراعظم نریندر مودی نے اظہار افسوس کرتے ہوئے ہلاک ہونے والوں کے لواحقین کو دو دو لاکھ روپے اور زخمیوں کو پچاس ہزار روپے امداد دینے کا اعلان کیا ہے۔
