دورۂ پاکستان شاندارتھا، ہمیں بادشاہوں کی طرح رکھا گیا: ہندوستانی کرکٹ بورڈ کے صدر راجر بنی
ہندوستانی کرکٹ بورڈ کے صدر راجر بنی نے اپنے دورۂ پاکستان کو شاندار قرار دیتے ہوئے کہا ہے کہ ہمیں پاکستان میں بادشاہوں کی طرح رکھا گیا۔
سحر نیوز/ ہندوستان: نئی دہلی سے موصولہ رپورٹ کے مطابق ہندوستانی کرکٹ کنٹرول بورڈ، بی سی سی آئی، کے صدر اور ہندوستان کی قومی کرکٹ ٹیم کا حصہ رہے راجر بنی نے اپنے حالیہ دورۂ پاکستان کے بارے میں خبر رساں ایجنسی اے این آئی سے بات کرتے ہوئے کہا کہ یہ ایک شاندار تجربہ تھا اور ہمیں ویسی ہی میزبانی ملی جیسی میزبانی ہمیں سنہ 1984 میں ٹیسٹ میچ کے دوران ملی تھی۔
انہوں نے کہا کہ ہمارے دورے سے سب بہت خوش تھے اور ہمیں بھی اس دورے سے بہت خوشی ہوئی اور یہ کہ ہمارے ساتھ بادشاہوں جیسا برتاؤ کیا گيا۔
واضح رہے کہ پاکستان کے بعض اعلی عہدیداروں نے بی سی سی آئی کے صدر اور نائب صدر راجر بنی اور راجیو شکلا کو ابھی حال ہی میں ایک کرکٹ میچ دیکھنے کے لئے پاکستان کے دورے کی دعوت دی تھی۔ اس دورے سے واپسی کے بعد راجر بنی نے پاکستانی میزبانی کی خوب تعریف کی ہے۔
