SAHAR

ہندوستان کے وزیر اعظم نے دعویٰ کیا ہے کہ گروپ بیس کے سربراہی اجلاس کے بعد ان کے ملک میں دنیا کی دلچسپی بڑھی ہے اور سیاحت میں فروغ آیا ہے۔

سحر نیوز/ ہندوستان: اطلاعات کے مطابق ہندوستان کے وزیر اعظم نریندر مودی نے اتوار کو اپنے ماہانہ ریڈیو پروگرام من کی بات میں سیاحت کے فروغ کی اہمیت پر زور دیا۔انھوں نے کہا کہ سیاحت میں کم ترین سرمایہ کاری سے زیادہ سے زیادہ روزگار کے مواقع فراہم ہوتے ہیں۔

ہندوستان کےوزیر اعظم کا کہنا تھا کہ گزشتہ کچھ برسوں سے ہندوستان میں دیگر ملکوں کی کشش بڑھی ہے جس میں گروپ بیس کے کامیاب سربراہی اجلاس سے اضافہ ہوا ہے۔نریندر مودی نے کہا کہ ہندوستان میں عالمی ثقافتی ورثے کی کل تعداد اب بیالیس ہوچکی ہے اور ہماری کوشش رہی ہے کہ ہمارے زیادہ سے زیادہ تاریخی اور ثقافتی مقامات کو عالمی ثقافتی ورثہ کے طور پر تسلیم کیا جائے۔