وقف ترمیمی بل مسلمانوں پر حملہ؛ جموں و کشمیر کے وزیراعلی کے مشیر کا بیان
ہندوستان کے زيرکنٹرول کشمیر کی سیاسی جماعت نیشنل کانفرنس کے سینئر لیڈر اور وزیر اعلیٰ عمر عبداللہ کے مشیر ناصر اسلم وانی نے وقف ترمیمی بل کو مسلمانوں پر ایک حملہ قرار دیا ہے۔
سحرنیوز/ہندوستان: ناصر اسلم وانی نے کہا کہ نیشنل کانفرنس نے اس بل کے خلاف عدالت عظمیٰ میں ایک عرضی دائر کی ہے۔ انہوں نے ساتھ ہی کہا کہ انہیں عدالت عظمیٰ سے انصاف کی امید ہے۔ ناصر اسلم وانی نے ان باتوں کا اظہار نامہ نگاروں کے ساتھ بات چیت کرنے کے دوران کیا۔ وقف بل کے بارے میں پوچھے جانے پر انہوں نے کہا کہ یہ بل ہمارے خلاف سیدھا حملہ ہے اور صرف مسلمانوں کو نشانہ بنایا گیا ہے۔ انہوں نے کہا کہ کسی بھی مذہبی ادارے پر اس طرح کا حملہ نہیں کیا جا رہا ہے جس طرح وقف پر کیا جا رہا ہے جو ہمیں برداشت نہیں ہے۔
نیشنل کانفرنس کے سینئر رہنما نے کہا کہ ہم کشیمر کے ریاستی درجے کی بحالی کا مطالبہ کر رہے ہیں اور یہ ہمارا حق ہے۔ انھوں نے کہا کہ ملک کے وزیر اعظم اور وزیر داخلہ نے بھی پارلیمنٹ میں اس کی بحالی کا وعدہ کیا ہے۔
