میڈیا کے غیر ذمہ دار رویے کی بناپر ہندوستان کی عالمی ساکھ متاثر ہورہی ہے :مولاناکلب جوادنقوی
دفتر مجلس علمائے ہند نے ایک بیان جاری کرکے ہندوستان میں میڈیا کے غیر ذمہ دارانہ رویہ پر سخت تنقید کی ہے۔
سحرنیوز/ہندوستان: دفتر مجلس علمائے ہند نے اپنے بیان میں رہبر انقلاب انقلاب اسلامی کے کردار کشی کی سازش کو ناکام قرار دیا ہے۔ بیان اس طرح ہے :
لکھنؤ یکم اگست ، مجلس علمائے ہند کے جنرل سکریٹری مولانا سید کلب جواد نقوی نے رہبر انقلاب اسلامی کے خلاف میڈیا کے ذریعہ جھوٹی اور پروپیگنڈہ خبریں پھیلانے اور ان کی کردار کشی کی ناکام کوشش کی مذمت کرتے ہوئے کہاکہ ہندوستان ہی نہیں دنیا کے بڑے معتبر سمجھے جانے والے صحافتی ادارے بھی فرضی اور پروپیگنڈہ خبریں نشر کرتے ہیں جس کی عالمی سطح پرمذمت ہونی چاہیے۔مولانانے کہا کہ آج میڈیا اتنے اعتماد کے ساتھ جھوٹ بولتاہے کہ سننے اور دیکھنے والا یقین کرنے پر مجبور ہوجاتاہے ۔
مولانانے کہاکہ ہندوستان کا میڈیا رہبر انقلاب اسلامی آیت اللہ خامنہ ای کے بارے میں جھوٹی اور پروپیگنڈہ خبریں نشر کررہاہے جس کی شکایت ہم نے وزیر اطلاعات جناب اشونی وشنو سے کی ہے ۔وزیر اطلاعات کو چاہیے کہ میڈیا کے لئے رہنما ہدایات جاری کریں اور جھوٹی خبریں چلانے والے نیوز چینل اور اخبارات پر کاروائی کی جائے۔
میڈیا کا یہ غیر ذمہ دار رویہ عالمی سطح پر ہندوستان کی ساکھ کو متاثر کررہاہے اور جابجا ملک کی بدنامی ہورہی ہے ،اس لئے میڈیا کی فرضی اور جھوٹی خبروں کے خلاف سخت کاروائی ہونی چاہیے ۔ مولانانے اپنے بیان میں مزید کہاکہ جیسا پروپیگنڈہ آج آیت اللہ خامنہ ای کے خلاف ہورہاہے ویساہی کل امام خمینیؒ کے خلاف ہوتاتھا۔
ان کے بارے میں بھی عالمی میڈیا میں فرضی خبریں چلائی جاتی تھیں تاکہ انہیں بدنام کیاجاسکے ۔چونکہ آج میڈیا پر استعمار مسلط ہے اس لئے پروپیگنڈہ اور بے بنیاد خبریں جو استعماری نظام کے حق میں سودمند ہوتی ہیں،زیادہ نشر کی جارہی ہیں ۔
ہندوستان کا میڈیا بھی استعماری نیوز ایجنسیوں کی زد میں ہے بلکہ بعض بکے ہوئے ہیں اور بعض ان کے نظریاتی غلام ہیں اس لئے ان سے اس کے علاوہ کچھ اور توقع نہیں کی جاسکتی ۔
مولانانے کہاکہ جس طرح رہبر انقلاب اسلامی کے خلاف جھوٹی خبریں چلائی جارہی ہیں اور منفی پروپیگنڈہ ہورہاہے اسی طرح میرے خلاف بھی فرضی خبریں چلائی جاتی ہیں تاکہ عوام کی نگاہوں میں میرے اعتبار کوساقط کیاجاسکے ۔
مولانا نے کہاکہ ہر کوئی ان خبروں پر یقین نہیں کرتا مگر بعض ایسے احمق ہوتے ہیں جو یقین کرلیتے ہیں ،اس لئے اس پروپیگنڈے کے خلاف بولنا ضروری ہوجاتاہے۔
جاری کردہ: دفتر مجلس علمائے ہند
