ہندوستان کی ریاست منی پور میں موسلا دھار بارشیں؛ علاقے زیر آب
ہندوستان کی ریاست منی پور میں موسلا دھار بارش کے بعد اچانک سیلاب اور زمین کھسکنے سے کئی علاقے زیرِ آب آئے۔
سحرنیوز/ہندوستان: منی پور میں گزشتہ چوبیس گھنٹوں کے دوران شدید بارشوں کے نتیجے میں اچانک سیلاب اور زمین کھسکنے کے متعدد واقعاست رونما ہوئے ہیں۔ انتظامیہ نے کے مطابق دارالحکومت امپھال ایسٹ کے علاقوں میں متعدد مقامات کو ڈھانپ دیا جس کے باعث کئی گھروں اور رہائشی احاطوں میں پانی داخل ہو گیا۔ مقامی لوگوں کا کہنا ہے کہ کچھ مکانات کے نچلے حصے مکمل طور پر زیرِ آب آگئے ہیں جبکہ بجلی و رابطہ متاثر ہونے سے امدادی کارروائیاں مشکل ہوگئی ہیں۔ سیلاب نے کسانوں کو بھی سخت تشویش میں مبتلا کر دیا ہے۔ پہاڑی اضلاع میں زمین کھسکنے اور تودے گرنے کے متعدد واقعات نے لوگوں کی پریشانیاں اور بڑھا دی ہیں۔ نونی ضلع کے آوانگ کھول، سناپتی اور کامجونگ میں مختلف مقاموں سے لینڈ سلائیڈ کی اطلاعات ہیں جن کے باعث سڑکوں اور آمد و رفت کے راستوں پر مٹی کے تودے آ گرے اور کچھ جگہوں پر رابطے منقطع ہوگئے۔ انتظامیہ نے علاقے کے مکینوں کو محتاط رہنے اور غیر ضروری طور پر گھروں سے باہر نہ نکلنے کی ہدایت جاری کی ہے۔
