ہندوستان: دہلی کے بین الاقوامی ہوائی اڈے پر سو سے زیادہ پروازیں منسوخ
ہندوستان کے دارالحکومت دہلی کے اندرا گاندھی بین الاقوامی ہوائی اڈے پر منگل کی صبح ایک سو چھبیس پروازیں منسوخ ہوگئیں۔
سحرنیوز/ہندوستان: ہندوستانی میڈیا ذرائع کی رپورٹ کے مطابق ہوائی اڈے کے افسران کے مطابق دوپہر بارہ بجے تک دہلی سے روانہ ہونے والی انچاس گھریلو پروازیں اور دہلی آنے والی ستتر پروازیں منسوخ ہو چکی تھیں۔ اگرچہ منگل کو پیر کے مقابلے میں گھنا کہرا نہیں تھا لیکن پیر کے روز ہوئی تاخیر اور منسوخ پروازوں کا اثر آج کی پروازوں پر بھی نظر آیا۔ اس کے علاوہ آج کی کم حدِ بصارت کا بھی کچھ اثر رہا۔
پیر کے روز مجموعی طور پر دوسواٹھاسی پروازیں منسوخ ہوئی تھیں، جن میں ایک سو اکتیس روانگی والی اور ستانوے آمد والی پروازیں شامل تھیں۔ اس کے علاوہ پانچ پروازوں کو دوسرے شہروں کی طرف موڑنا پڑا تھا۔
دہلی ایئرپورٹ کی جانب سے دوپہر کے وقت سوشل میڈیا پر جاری ایک پوسٹ میں بتایا گیا کہ اب پروازوں کا آپریشن بغیر کسی رکاوٹ کے جاری ہے تاہم صبح کی تاخیر کا کچھ اثر آگے بھی محسوس کیا جا سکتا ہے۔ مسافروں کو مشورہ دیا گیا ہے کہ وہ اپنی پرواز کی درست صورت حال جاننے کے لیے متعلقہ ایئر لائن سے رابطہ کریں۔
ہمیں فالو کریں:
Followus: Facebook, X, instagram, tiktok whatsapp channel
