ہندوستان؛ لکھنؤ یونیورسٹی میں مسجد کا گیٹ بند کرنے پر تنازع، ہندو طلبہ نے نمازیوں کا ساتھ دیا

Feb ۲۳, ۲۰۲۶ ۱۶:۵۴ Asia/Tehran

لکھنؤ یونیورسٹی کے کیمپس میں لال بارہ دری عمارت میں واقع مسجد پر اچانک تالا لگا دیئے جانے پر طلبہ نے شدید احتجاج کیا-

سحرنیوز/ہندوستان: لکھنو یونیورسٹی انتظامیہ کی جانب سے سیکورٹی کے نام پر تاریخی لال بارہ دری اور اس کے اندر موجود قدیمی مسجد کے گیٹ کو سیل کر کے بیریکیڈ لگائے جانے سے وہاں کشیدگی پھیل گئی۔ اس کارروائی کے خلاف طلباء لیڈروں اور مسلم طلباء نے کیمپس میں شدید احتجاج کیا۔

احتجاج کے دوران یونیورسٹی کیمپس میں مسجد کا گیٹ بند کئے جانے کی وجہ سے مسلمان طلباء نے مسجد کے باہر ہی نماز ادا کرنا شروع کی تو ہندو طلبا نے فرقہ وارانہ ہم آہنگی کی مثال قائم کرتے ہوئے حفاظتی گھیرا بناکر مسلم نمازیوں کی حفاظت کی۔

ہمیں فالو کریں:

اس سلسلے میں یونیورسٹی کی جانب سے کہا گیا ہے کہ اے ایس آئی کی محفوظ کردہ اس بوسیدہ عمارت سے ہونے والے ممکنہ خطرے کو روکنے کے لیے یہ قدم اٹھایا گیا ہے۔ لکھنو یونیورسٹی میں طلبہ لیڈروں نے انتباہ دیا ہے کہ جب تک مسجد کا دروازہ نہیں کھولاجاتا ہے، ہم یہیں باہر نماز اداکریں گے، روزہ افطار کریں گے اور دیگر امور انجام دیں گے۔