ایران اور روس کی باہمی تعاون کے فروغ پر تاکید
روسی ایوان صدر نے رپورٹ دی ہے کہ صدر ولادیمیر پوتین نے اسلامی جمہوریہ ایران کے نومنتخب صدر مسعود پزشکیان کے ساتھ ٹیلی فونی گفتگو میں تہران ماسکو روابط کا جائزہ لیا۔
سحر نیوز/ ایران: روس کے صدر ولادیمیر پوتین نے اس سے پہلے سنیچر کو ایک پیغام ارسال کر کے ایران کا صدر منتخب ہونے پر مسعود پزشکیان کو مبارکباد دی تھی۔
روسی صدر نے ٹیلی فونی گفتگو میں ایک بار پھر انہیں صدر منتخب ہونے پر مبارکباد پیش کرتے ہوئے ان کی کامیابی کی آرزو کی۔
دونوں رہنماؤں نے اس ٹیلی فونی گفتگو میں تہران اور ماسکو کے درمیان اعلیٰ سطح کے دوستانہ روابط پر خوشی کا اظہار کرتے ہوئے دونوں ملکوں کی زیادہ سے زیادہ قربت اور باہمی تعاون میں زیادہ سے زیادہ توسیع پر زور دیا۔
مسعود پزشکیان اور ولادیمیر پوتین نے رواں عیسوی سال میں ورکنگ پروگرام کے بارے میں رابطے پر بھی اتفاق کیا۔
اس درمیان روسی ایوان صدر کے ترجمان نے ایران کے صدارتی الیکشن اور مسعود پزشکیان کے صدر منتخب ہونے کی طرف اشارہ کرتے ہوئے کہا کہ روس کو امید ہے کہ ایران کے ساتھ اس کے قریبی دوستانہ روابط جاری رہیں گے۔
روسی ایوان صدر کے ترجمان دیمتری پسکوف نے ایران کے صدارتی الیکشن کے بارے میں پوچھے گئے ایک سوال کے جواب میں کہا کہ ماسکو ایرانی عوام کے انتخاب کے احترام کا قائل ہے اور نئے ایرانی صدر کے لئے کامیابی کی آرزو کرتا ہے۔
انھوں نے کہا کہ اس وقت تہران ماسکو روابط بہت اچھے اور فروغ پذیر ہیں اور ہمیں امید ہے کہ مختلف شعبوں میں ہمارے قریبی تعاون کا سلسلہ اسی طرح جاری رہے گا۔
