ایران اور پاکستان کے وزرائے خارجہ کی ٹیلی فونی گفتگو، اسلامی تعاون تنظیم کے وزرائے خارجہ کے ہنگامی اجلاس میں پاکستان کی شرکت
پاکستان کے وزیر خارجہ نے اپنے ایرانی ہم منصب سے ٹیلیفونی گفتگو میں کہا کہ اسلام آباد، شہید اسماعیل ہنیہ کی شہادت کے بعد اسلامی تعاون تنظیم کے وزرائے خارجہ کا غیر معمولی اجلاس منعقد کرنے کی تہران کی درخواست کی نہ صرف حمایت کرتا ہے بلکہ پاکستانی وفد اس اجلاس میں بڑھ چڑھ کر حصہ لےگا۔
سحرنیوز/ایران: پاکستان کی وزارت خارجہ کے تعلقات عامہ کے مطابق، سینیٹر محمد اسحاق ڈار نے علی باقری کنی کے ساتھ ٹیلی فونی بات چیت کی۔ ایران کے وزیر خارجہ نے تہران میں ہونے والے دہشت گردانہ واقعے پر گفتگو کرتے ہوئے تحریک حماس کے سربراہ اسماعیل ہنیہ کی شہادت اور غزہ میں صیہونی جرائم کے تسلسل کی شدید مذمت کی۔
اسحاق ڈار نے تہران میں شہید ہنیہ کی شہادت کو ایک گھناؤنا فعل قرار دیتے ہوئے اپنے ایرانی ہم منصب کو بتایا کہ پاکستان کی قومی اسمبلی نے اس دہشت گردانہ کارروائی کے خلاف مذمتی قرارداد منظور کی ہے۔
علی باقری نے اسحاق ڈار کو اسلامی تعاون تنظیم کے وزرائے خارجہ کے غیرمعمولی اجلاس میں شرکت کی دعوت دی جس کا پاکستان کی جانب سے خیر مقدم کیا گیا۔ اسحاق ڈار نے کہا کہ اسلام آباد شہید اسماعیل ہنیہ کی شہادت کے بعد اسلامی تعاون تنظیم کے وزرائے خارجہ کا غیر معمولی اجلاس منعقد کرنے کی تہران کی درخواست کی نہ صرف حمایت کرتا ہے بلکہ پاکستانی وفد اس اجلاس میں بڑھ چڑھ کر حصہ لے گا۔
