سلامتی کونسل مستقل اراکین کے ہاتھ کا آلہ کار: ایران
کاظم غریب آبادی نے کہا ہے کہ سلامتی کونسل بعض ایسے مستقل اراکین کے ہاتھ کا آلہ کار بن چکی ہے جو اپنے سیاسی اور اسٹریٹجک مفادات کو عالمی امن پر ترجیح دیتے ہیں۔
سحرنیوز/ ایران: ایران کی وزارت خارجہ کے قانونی اور بین الاقوامی امور کے ذمہ دار کاظم غریب آبادی نے سلامتی کونسل کے وزراء کے اعلیٰ سطحی اجلاس میں "امن کے لیے قیادت اور اقوام متحدہ کے چارٹر کے احترام میں متحد ہو کر ایک محفوظ مستقبل کے حصول کے لیے کوشش" کے عنوان سے گفتگو میں سیکیورٹی اینڈ کرائمز کونسل کی کارکردگی پر کڑی تنقید اور صیہونی حکومت کے جرائم پر عالمی برادری سے فوری کارروائی کا مطالبہ کیا۔
غریب آبادی نے کہا کہ "بین الاقوامی قانون اور اقوام متحدہ کے چارٹر میں موجود اصول، جو کبھی بین الاقوامی تعلقات کی بنیاد تھے، اب تشویشناک حد تک نظر انداز کیے جا رہے ہیں اور بین الاقوامی قوانین، خاص طور پر بین الاقوامی انسانی قانون کی سنگین خلاف ورزیاں، معمول بنتے جا رہے ہیں۔
انہوں نے غزہ اور لبنان میں صیہونی حکومت کے جرائم کی مذمت کرتے ہوئے کہا کہ غزہ کی صورتحال بین الاقوامی امن و سلامتی کو برقرار رکھنے میں اجتماعی ناکامی ہے۔
کاظم غریب آبادی نے کہا کہ ہم ایک بے مثال انسانی تباہی کا مشاہدہ کر رہے ہیں۔ انھوں نے کہا کہ اقوام متحدہ کے ایک اعلی عہدیدار نے بالکل صحیح کہا ہے کہ غزہ 'زمین پر جہنم' بن چکا ہے۔
لبنان پر صیہونی حکومت کے حملوں کا ذکر کرتے ہوئے کہا کہ "دہشت گردانہ مقاصد" کے لیے جدید ٹیکنالوجی کے استعمال سے گنجان آبادی کے علاقوں میں شہریوں کو جان بوجھ کر نشانہ بنانا بین الاقوامی قانون، انسانی حقوق اور اقوام متحدہ کی متعدد قراردادوں کی صریح خلاف ورزی ہے۔ انھوں نے کہا کہ یہ وحشیانہ حملہ نہ صرف لبنان کے لوگوں پر بلکہ پوری انسانیت پر حملہ ہے۔
