جرمنی کے ناظم الامور وزارت خارجہ میں طلب
ایرانی شہریوں کو سفارتی خدمات سے محروم کرنے کے حوالے سے جرمن حکومت کے بلاجواز فیصلے کے بعد، تہران میں جرمنی کے ناظم الامور کو وزارت خارجہ میں طلب کرلیا گیا ہے۔
سحر نیوز/ ایران: وزارت خارجہ کے مغربی یورپ ڈیسک کے سربراہ نے جرمن ناظم الامور ہانس پیٹر یوگل کو طلب کرکے اسلامی جمہوریہ ایران کی شدید ناراضگی کا اظہار کیا۔
مغربی یورپ ڈیسک کے سربراہ نے ایرانی عوام کے سلسلے میں جرمن حکومت کے اقدامات کو اشتعال انگیز اور بلاجواز قرار دیا اور کہا کہ برلن نے فرینکفرٹ، ہیمبرگ اور میونخ میں اسلامی جمہوریہ ایران کے قونصل خانوں کی خدمات کو معطل کرکے ایرانی شہریوں کو ان کے ابتدائی حقوق سے بھی محروم کیا ہے اور دونوں ملکوں کے عوام کے مابین تاریخی تعلقات بھی متاثر کرنے کی کوشش کی ہے۔
وزارت خارجہ نے ایران کے سلسلے میں جرمن وزیر خارجہ کے حالیہ بیان کو بیہودہ، ادب کے خلاف، مداخلت پسندانہ، عالمی حقوق کے منافی اور غیرسفارتکارانہ قرار دیا اور کہا جرمن حکومت کی غیرتعمیری اور جارحانہ پالیسی اس کے غلط اندازوں کا نتیجہ ہے جس کے نتائج کی ذمہ داری جرمن حکومت پرعائد ہوگی۔
وزارت خارجہ نے جرمن ناظم الامور کو بین الاقوامی ضابطوں من جملہ دیگر ممالک کے اقتدار اعلی کے احترام، ان کے اندرونی معاملات میں عدم مداخلت، دوسرے ممالک کی عدالتی کارروائی کے احترام کی یاد دہانی کرائی اور جرمن حکومت کی جانب سے ان اصولوں کی خلاف ورزی کی سختی سے مذمت کی۔
