SAHAR

ایرانی بحریہ نے خلیج فارس میں خلاف ورزی کرنے والے غاصب صیہونی حکومت کے ایک بحری جہاز کو اپنے قبضے میں لے لیا۔

سحرنیوز/ایران:  ایرانی بحریہ نے خلیج فارس میں صیہونی حکومت کے ایک بحری جہاز کو قبضے میں لے لیا ہے۔ ابھی اس حوالے تفصیلات فراہم نہیں کی گئیں۔ رپورٹ کے مطابق، ایم ایس سی ایریز نامی ایک بحری کنٹینر کو ایرانی بحریہ کے خصوصی دستوں نے آبنائے ہرمز کے قریب ہیلی برن آپریشن کے ذریعے قبضے میں لیا تھا۔ یاد رہے پرتگالی پرچم والے اس بحری جہاز کو زوڈیاک کمپنی چلاتی ہے جو ایال عوفر نامی صیہونی ٹائیکون کی ملکیت ہے۔

دوسری جانب ایرانی بحریہ کے کمانڈر ایڈمرل علی رضا تنگسیری نے کہا کہ بحریہ کسی غیر ملکی طاقت پر انحصار کئے بغیر جدید سائنسی ترقی کی راہ میں قدم اٹھا رہی ہے۔ انہوں نے واضح کیا کہ ماضی میں ہمیں دشمن کا مقابلہ کرنے کے لیے غیر ملکی تعاون حاصل کرنا پڑتا تھا لیکن آج ہم اپنی تمام دفاعی ضروریات ملکی سطح پر فراہم کرتے ہیں۔ ایڈمرل تنگسیری نے مزید کہا کہ بحریہ آج طاقت کے اس مرحلے پر پہنچ گئی ہے کہ وہ کسی بھی خطرے کا فیصلہ کن اور زبردست جواب دے سکتی ہے۔ انہوں نے اس بات پر زور دیا کہ خلیج فارس میں تنب بزرگ، تنب کوچک اور ابو موسیٰ سمیت دیگر جزائر ہمیشہ سے ایران کا حصہ رہے ہیں اور جب تک ایران موجود ہے ایرانی ہی رہیں گے۔