ولادت امام رضاؑ کی مناسبت سے پورا تہران جشن میں ڈوبا، ہر طرف یا ثامن الحجج کی صدائیں گونج رہی ہیں
ایران کے دار الحکومت تہران میں ملک کے دیگر دس بڑے شہروں کی طرح حضرت امام رضا (ع) کے یوم ولادت کی مناسبت سے لاکھوں کی تعداد میں عقیدت مند سڑکوں پر امڈ پڑے۔
سحر نیوز/ ایران: ہمارے نامہ نگار کے مطابق، آٹھویں آفتاب ولایت حضرت امام رضا علیہ السلام کی ولادت کی آمد پر ایران کے دار الحکومت تہران میں آج ایک عظیم الشان جشن کا اہتمام کیا گیا ہے جہاں پیروان اہل بیت ع کا پرشکوہ اجتماع ہفت تیر اسکوائر سے حضرت ولی عصر اسکوائر تک نظر آرہا ہے جو رات دس بجے تک جاری رہے گا۔
اس عظیم الشان جشن کے شرکاء کی خدمت کے لئے 400 سے زیادہ انتظامی موکب (کھانے پینے سمیت دیگر ثقافتی خدمات کے خیمے) لگائے گئے ہیں جہاں کئی ہزار رضاکار خدمت کے لئے آمادہ ہیں۔
اس عظیم اجتماع میں مختلف ثقافتی سرگرمیوں کا بھی اہتمام کیا گیا ہے۔ جہاں والدین اپنے بچوں کے ساتھ ہلکی سی تفریحی سرگرمیوں سے لطف اندوز ہوسکتے ہیں۔
حضرت امام علی بن موسی الرضا (ع) سے بے پناہ محبت و عقیدت ایرانیوں کے وجود میں رچ بس گئی ہے جس کا اظہار اس پرشکوہ جشن میں نظر آرہا ہے۔
اس عظیم جشن میں زندگی کے ہر شعبے سے تعلق رکھنے والے افراد بھرپور انداز میں شریک نظر آتے ہیں۔ جہاں ایک طرف بچے کھیل کود میں مصروف ہیں تو دوسری طرف ہاتھوں میں پرچم امام رضا تھامے عقیدت مندوں کا سیل رواں اپنی منزل کی طرف تیزی سے بڑھ رہا ہے، فضاوں میں یا ثامن الحجج کی صدائیں گونج رہی ہیں اور مداحان اہل بیت ع مدحت ثامن الحجج کے پھول نچھاور کر رہے ہیں۔
