ایران خطے میں امن و استحکام کو اہمیت دیتا ہے؛ عراقچی
ایران کے وزیر خارجہ نے کہا ہے کہ ایران ہمسایہ ممالک کے درمیان کشیدگی کے خاتمے کے لیے اپنی کسی بھی کوشش سے دریغ نہیں کرے گا۔
سحرنیوز/ایران: ایران کے وزیر خارجہ سید عباس عراقچی نے کہا ہے کہ اسلامی جمہوریہ ایران خطے میں امن و استحکام کو بہت اہمیت دیتا ہے اور ہمسایہ ممالک کے درمیان کشیدگی کے خاتمے کے لیے کسی بھی کوشش سے دریغ نہیں کرے گا۔ اپنے حالیہ دورۂ دہلی کا ذکر کرتے ہوئے ایک سوشل میڈیا پوسٹ میں انہوں نے کہا کہ ہندوستان کے حالیہ دورے کے دوران ان کی ملاقات ہندوستان کی صدر، وزیر خارجہ اور قومی سلامتی کے مشیر سے ہوئی۔
اس کے علاوہ ایران و ہندوستان کے بیسویں مشترکہ کمیشن کا اجلاس بھی وزرائے خارجہ کی سربراہی میں منعقد ہوا۔انہوں نے ایران اور ہندوستان کے درمیان تعلقات کو دیرینہ اور دوستانہ قرار دیا اور کہا کہ عالمی اتار چڑھاؤ کے باوجود یہ روابط ہمیشہ مضبوط اور فعال رہے ہیں۔
عراقچی نے امید ظاہر کی کہ ایران کی حکومت کی فعال اور متوازن خارجہ پالیسی کے تحت ایران- ہندوستان تعلقات نئے عروج تک پہنچیں گے۔ آخر میں انہوں نے تاکید کی کہ اسلامی جمہوریہ ایران خطے میں پائیدار امن کے قیام کے لیے ہمسایہ ممالک کے ساتھ تعاون جاری رکھنے اور کشیدگی کے خاتمے کے لیے ہر ممکن کوشش پر آمادہ ہے۔
