ایران قطر میں اپنے بھائیوں کے ساتھ کھڑا ہے؛ ایرانی صدر اور امیر قطر کی ٹیلی فونی گفتگو
صدر مملکت ڈاکٹر مسعود پزشکیان نے کہا ہے کہ اسلامی جمہوریہ ایران ، قطر میں اپنے بھائیوں کے ساتھ کھڑا ہے اور اسلامی ممالک ، صیہونی حکومت کے کھلے جرائم کی زبانی و عملی طور پر پوری سنجیدگی سے بھرپور مذمت کریں۔
سحرنیوز/ایران: صدر مملک مسعود پزشکیان نے منگل کی شام امیر قطر شیخ تمیم بن حمد آل ثانی سے ٹیلی فونی گفتگو میں صیہونی حکومت کے جرائم کی شدید مذمت کرتے ہوئے کہا کہ اسلامی جمہوریہ ایران ، قطر میں اپنے بھائيوں کے ساتھ کھڑا ہے اور اپنے پڑوسی اور دوست ملک کی حمایت کے لئے جو اقدام بھی ضروری ہوا انجام دے گا۔ صدر مملکت نے اس بات کا ذکر کرتے ہوئے کہ صیہونی حکومت، کسی بھی مسلمہ بین الاقوامی اصول و ضوابط کی پابند نہيں ہے اور کسی بھی بین الاقوامی اصول و قانون کا احترام نہيں کرتی کہا کہ صیہونی حکومت کا یہ رویہ پوری طرح امریکہ کی حمایت سے انجام پا رہا ہے۔
پزشکیان نے کہا کہ صیہونی حکومت نے اپنی سیکورٹی کے دفاع و تحفظ کے نام پر پورے علاقے کے امن و استحکام کو درہم برہم کر کے رکھ دیا ہے اور کسی بھی جرم کا ارتکاب کرنے سے گریز نہيں کرتی۔
صدر ایران نے کہا کہ اسلامی ممالک کو چاہئے کہ ایک ساتھ مل کر متحدہ موقف اختیار کریں اور ایک دوسرے کے ہاتھ میں ہاتھ دے کر زبان و عمل سے صیہونی حکومت کے اس کھلے جرم و جارحیت کی پوری سنجیدگی سے بھرپور مذمت کریں تاکہ یہ جارح و جنایت پیشہ حکومت اس طرح کا اقدام دہرانے کی جرئت نہ کرے۔
امیر قطر نے صدر ایران کے ٹیلی فون پر ان کا شکریہ ادا کرتے ہوئے کہا کہ جیسا کہ جنابعالی نے اشارہ کیا، جرائم پیشہ نیتن یاہو، اپنے جرائم کو انجام دینے میں میں کسی بھی حد تک جا سکتا ہے اور افسوس کہ جہاں بھی چاہتا ہے، جس طرح بھی چاہتا ہے کوئی روکاوٹ محسوس کئے بغیر حملہ اور بمباری کرتا ہے۔
امیر قطر شیخ تمیم بن حمد آل ثانی نے اس بات پر تاکید کرتے ہوئے کہ علاقے کے ممالک کو صیہونی حکومت کے جرائم کے سلسلے میں متحد موقف اختیار کرنا چاہئے کہا کہ حماس کے رہنما جنگ بندی کے لئے امریکی تجویز پر غور کر رہے تھے اور ہم سے ہونے والے صلاح و مشورے کے بعد وہ اس تجویز کا مثبت جواب دینے والے تھے لیکن افسوس کہ اسرائیل نے اسی اجلاس پر حملہ کردیا امیر قطر نے امید ظاہر کی کہ قطر کے ساتھ اسلامی جمہوریہ ایران اور دیگر اسلامی ممالک کے رابطے آئندہ دنوں میں بھی جاری رہیں گے تاکہ باہمی تعاون و کوششوں سے اسرائیلی جرائم کو رکوانے کے لئے موثر اقدام کریں۔
