سعودی فوجی اڈے پر یمنی فورس کا حملہ
یمن کی عوامی رضاکار فورس نے سعودی عرب کے جنوبی علاقے میں سعودی فوج کے ٹھکانوں پر میزائلوں سے حملہ کیا ہے۔
یمن کی عوامی رضاکار فورس نے سعودی عرب کے سرحدی صوبے نجران میں سعودی فوج کے ٹھکانوں پر زلزال تین میزائلوں سے حملہ کیا ہے-
المسیرہ ٹیلی ویژن چینل نے خبر دی ہے کہ عوامی تحریک انصار اللہ کے جیالوں نے سعودی عرب کے وحشیانہ حملوں کے جواب میں بن یالین فوجی چھاؤنی پرحملہ کیا ہے- اس سے پہلے یمن کی عوامی رضاکار فورس نے گذشتہ ہفتے بھی یمن کے صوبہ الجوف میں سعودی عرب کے اتحادی فوجیوں کے ہتھیاروں کے گوداموں پر میزائل سے حملہ کر کے انہیں منہدم کر دیا تھا -
قبل ازیں یمن کی عوامی رضاکار فورس نے دس جولائی کو سعودی فوج کے شیحاط فوجی اڈے پر بھی حملہ کیا تھا جبکہ نو جولائی کو یمن کے صوبہ مارب میں بھی سعودی عرب کے اتحادی فوجیوں کے ٹھکانوں پر انصار اللہ اور یمنی فوج نے حملہ کر کے انہیں خاصا نقصان پہنچایا تھا۔
