صنعا میں بڑا عوامی مظاہرہ، سامراجیوں کے خلاف فلک شگاف نعرے
یمن کے ہزاروں افراد نے دارالحکومت صنعا میں سامراجیوں کے خلاف نعرے کے عنوان سے ایک بڑے مظاہرے میں شرکت کی۔
سحر نیوز/ عالم اسلام: ایران پریس کی رپورٹ کے مطابق ہزاروں یمنی باشندے بدھ کے روز "سامراجیوں کے خلاف نعرے" کے پروگرام کو بیس سال کا عرصہ پورے ہونے پر سڑکوں پر نکل آئے اور امریکہ اور اسرائیل کے خلاف نعرے لگائے۔ مظاہرین نے امریکی اور اسرائیلی مصنوعات کے بائیکاٹ کا بھی مطالبہ کیا۔
انجمن علمائے یمن کے رکن محمد المتوکل نے صنعا میں ایران پریس کے نامہ نگار سے بات چیت کرتے ہوئے کہا کہ یمن کے عوام اپنے اصلی مسائل یعنی بیت المقدس اور مسجد الاقصی کو اہمیت دیتے ہیں اور سامراجیوں کے خلاف نعرے کے پروگرام سے لوگ دشمنوں کے خلاف اکٹھے ہوتے ہیں۔
یمن کی اعلی سیاسی کونسل کے مشیر محمد مفتاح نے بھی اس مظاہرے کے موقع پر ایران پریس کے نمائندے سے بات چیت کرتے ہوئے کہا کہ امریکہ کی اجارہ داری کا مقابلہ اور جارحین کے خلاف احتجاج یمنی عوام کے لیے کامیابیاں لے کر آیا ہے۔ انھوں نے کہا کہ یمن کے عوام امریکہ کی اجارہ داری کے سامنے استقامت و پائیداری کی پہلی صف میں ہیں اور وہ امریکی اور اسرائیلی مصنوعات کا بائیکاٹ کرنے میں پیش پیش رہے ہیں۔
واضح رہے کہ حسین بن بدر الدین الحوثی نے سامراجیوں کے خلاف نعرے کا پروگرام شروع کیا تھا اور یہ پروگرام گذشتہ بیس سال سے صنعا میں منعقد کیا جا رہا ہے۔
