غزہ پر صیہونی بمبار طیاروں کی وحشیانہ بمباری، بائیس فلسطینی شہید اور متعدد زخمی
غزہ کے مرکز میں واقع البریج کیمپ پر صیہونی حکومت کے لڑاکا طیاروں کے حملے میں بیس سے زیادہ فلسطینی شہید ہوگئے۔
سحرنیوز/عالم اسلام: صیہونی حکومت کے جنگی طیاروں نے البریج کیمپ پر جو غزہ کے مرکز میں واقع ہے شدید بمباری کی ہے جس کے نتیجے میں بائيس فلسطینی شہید ہوگئے۔
پناہ گزینوں کے اس کمیپ پر صیہونی حکومت کے لڑاکا طیاروں کے حملے کے نتیجے میں متعدد فلسطینی لاپتہ بھی ہیں۔ اس حملے میں ایک رہائشی مکان کو بھی نشانہ بنایا گيا ۔
اس سے قبل صیہونی حکومت نے متعدد بار جبالیا کیمپ پر بمباری کی ہے کہ جس میں سو سے زيادہ افراد شہید ہوئے اور تین سو کے قریب زخمی ہوگئے۔
فلسطین کی وزارت داخلہ نے بھی ایک رپورٹ میں اعلان کیا ہے کہ شمالی غزہ میں واقع جبالیا کیمپ پر صیہونی فوجیوں کے حملے میں یہ کیمپ مکمل طور پر ویران ہوگيا ہے۔
فلسطین کی وزارت صحت نے اعلان کیا ہے کہ غزہ میں شہید ہونے والوں کی تعداد ابھی تک نو ہزار اکسٹھ ہوچکی ہے جبکہ بتیس ہزار سے زیادہ زخمی ہوئے ہيں۔
