استقامتی محاذ کے مجاہدوں نے اسرائیل کی اینٹ سے اینٹ بجا دی 36 اسرائیلی فوجی ہلاک و زخمی
صہیونی ریڈیو نے اعلان کیا ہے کہ شمالی غزہ کی پٹی میں تین ماہ سے زیادہ عرصہ قبل شروع ہونے والی کارروائیوں میں 46 صہیونی فوجی اور آفیسرہلاک ہوئے ہیں۔
سحر نیوز/ عالم اسلام: صیہونی حکومت کے ذرائع ابلاغ نے اطلاع دی ہے کہ غزہ کی پٹی میں گزشتہ 24 گھنٹوں کے دوران ہونے والی جھڑپوں اور بیت حانون شہر میں القسام بٹالین کے دو گھات لگائے ہوئے حملوں میں 6 صیہونی فوجی ہلاک اور 30 سے زائد زخمی ہوئے ہیں۔
بدھ کی رات صیہونی حکومت کے ذرائع ابلاغ نے غزہ میں ایک بم دھماکے میں فوجیوں کی ہلاکت کا اعتراف کیا۔ صیہونی حکومت کے ذرائع ابلاغ نے خبر دی ہے کہ غزہ میں ایک دیسی ساختہ بم کے پھٹنے سے اس حکومت کی فوج کے تین دیگر فوجی ہلاک اور متعدد زخمی ہوگئے ہیں۔
اس سے قبل میڈیا ذرائع نے غزہ کی پٹی میں استقامتی محاذ کے ہاتھوں اسرائیل کے کئی ٹینکوں کے تباہ ہونے اور فوجیوں کے ہلاک ہونے کی خبر دی تھی۔
صہیونی ریڈیو نے بھی اعلان کیا ہے کہ شمالی غزہ کی پٹی میں تین ماہ سے زیادہ عرصہ قبل شروع ہونے والی کارروائیوں میں 46 صہیونی فوجی اور آفیسرہلاک ہوئے ہیں۔
غزہ کی پٹی میں جنگ 461 ویں دن میں داخل ہو چکی ہے، جب کہ بعض صہیونی میڈیا نے اپنے جانی نقصان کے اعدادوشمار کا اعلان کرتے ہوئے اسرائیلی فوج کی سخت سنسر شپ کی طرف اشارہ کیا ہے۔
صہیونی میڈیا نے اس سے قبل انکشاف کیا تھا کہ اسرائیلی فوج کی طرف سے اعلان کردہ زخمیوں کی تعداد اس حکومت کے ہسپتالوں کے فراہم کردہ اعدادوشمار سے بہت مختلف ہے۔ صیہونی حکومت کے چینل 12 نے پہلے اعلان کیا تھا کہ اس حکومت کی فوج نے ہسپتال کے حکام سے کہا ہے کہ وہ فوج کے ساتھ ہم آہنگی کے بغیر ہلاکتوں کے اعداد و شمار شائع نہ کریں۔
