صیہونی حکومت کو غزہ میں اپنے قیدیوں کی جان کی کوئی پرواہ نہیں: حماس
صیہونی حکومت کی جانب سے جنگ بندی کی مسلسل خلاف ورزی کا حوالہ دیتے ہوئے حماس نے تاکید کی کہ غاصب حکومت کو غزہ پٹی میں اپنے قیدیوں کی جان کی کوئی پرواہ نہیں ہے۔
سحر نیوز/ عالم اسلام: حماس نے ایک بیان جاری کر کے کہا ہے کہ صہیونی دشمن جنگ بندی معاہدے کی خلاف ورزی اور نہتے شہریوں کو نشانہ بنا رہی ہے۔ بیان میں کہا گیا ہے کہ قابض حکومت کے جرائم اور گزرگاہوں کی بندش سے نیتن یاہو کی دہشت گرد کابینہ کے جنگ بندی معاہدے سے گریز کی عکاسی ہوتی ہے۔ غاصب حکومت کو غزہ پٹی میں اپنے قیدیوں اور بین الاقوامی اور انسانی قوانین کی کوئی پرواہ نہیں ہے۔ حماس نے کہا کہ ہم جنگ بندی معاہدے کی ضمانت دینے والے ثالثوں سے مطالبہ کرتے ہیں کہ وہ قابض حکومت کے جرائم اور اس کی مسلسل جارحیتوں کو روکنے کے لیے فوری مداخلت کریں اور ہم عالمی برادری سے اپیل کرتے ہیں کہ وہ غزہ پٹی کا محاصرہ ختم کرانے کے لیے ذمہ دارانہ اقدامات کریں اور غاصب اسرائیل کی طرف سے بھوک اور قحط کے جرائم کو روکیں۔
