یوکرین کے بحران کو سفارتی طریقے سے حل کیا جائے، پاکستان کا مطالبہ
پاکستان کے وزیر خارجہ شاہ محمد قریشی نے روسی ہم منصب سرگئی لاوروف سے رابطہ کرکے یوکرین کے ساتھ کشیدگی میں اقوام متحدہ کے بنیادی اصولوں کے مطابق کمی لانے کی ضرورت پر زور دیا۔
پاکستان کے دفترخارجہ کے ترجمان عاصم افتخار کی جانب سے جاری بیان میں کہا گیا کہ وزیر خارجہ شاہ محمود قریشی اور روس کے وزیر خارجہ سرگئی لاروف کے مابین ٹیلیفونک رابطہ ہوا۔
بیان میں کہا گیا کہ دونوں وزرائے خارجہ کے درمیان دوران گفتگو دو طرفہ تعلقات اور علاقائی صورت حال پر تبادلہ خیال کیا گیا اور وزیر اعظم عمران خان کے حالیہ دورےکا حوالہ دیتے ہوئے دو طرفہ ایجنڈے اور افغانستان سمیت خطے کے اہم موضوعات پر تفصیلی تبادلہ خیال کیا گیا۔
دفترخارجہ کے مطابق سرگئی لاوروف نے گزشتہ روز پشاور میں ہونے والے دہشت گردی کے واقعے میں قیمتی انسانی جانوں کے ضیاع پر گہرے رنج اور افسوس کا اظہار کرتے ہوئے روس کی طرف سے ہر قسم کی دہشت گردی کی مذمت کی۔
ترجمان دفترخارجہ نے بتایا کہ دونوں وزرائے خارجہ کا افغانستان میں امن اور استحکام کے مشترکہ اہداف کے لیے مل کر کام جاری رکھنے پر اتفاق کیا۔
انہوں نے کہا کہ وزیر خارجہ نے یوکرین کی صورت حال پر پاکستان کی تشویش کا حوالہ دیتے ہوئے اقوام متحدہ کے چارٹر کے بنیادی اصولوں کے مطابق کشیدگی میں کمی لانے کی ضرورت پر زور دیا۔
وزیر خارجہ نے کثیر الجہتی معاہدوں، بین الاقوامی قانون کے مطابق اور اقوام متحدہ کے چارٹر کے تحت تنازع کے سفارتی تصفیے کی ضرورت پر زور دیا۔
یوکرین کے ساتھ کشیدگی کے حوالے سے شاہ محمود قریشی نے تنازع کے پر امن حل کے لیے یوکرین، پولینڈ، رومانیہ اور ہنگری کے وزرائے خارجہ اور یورپی یونین کے اعلیٰ نمائندے برائے خارجہ امور کے ساتھ ہونے ہونے والے حالیہ ٹیلیفونک رابطوں سے بھی روسی ہم منصب کو آگاہ کیا۔
شاہ محمود قریشی نے کہا کہ توقع ہے کہ روس اور یوکرین کے درمیان شروع ہونے والے مذاکرات سفارتی حل تلاش کرنے میں کامیابی سے ہمکنار ہوں گے۔
اس موقع پر روسی وزیر خارجہ نے وزیر خارجہ شاہ محمود قریشی کو صورت حال پر روس کے نکتہ نظر سے آگاہ کیا۔
بیان میں کہا گیا کہ دونوں وزرائے خارجہ نے ابھرتی ہوئی صورت حال پر رابطے جاری رکھنے پر اتفاق کیا۔
