اسماعیل ہنیہ کی شہادت میں اسرائیل ملوث ہے: پاکستانی وزیراعظم
شہباز شریف نے کہا ہے کہ پورا پاکستان اور عالمِ اسلام اسماعیل ہنیہ کی شہادت پر اشکبار ہے۔
سحر نیوز/ پاکستان: پاکستان کی قومی اسمبلی میں اظہارِ خیال کرتے ہوئے پاکستان کے وزیراعظم شہباز شریف نے کہا کہ حماس کے سابق سربراہ اسماعیل ہنیہ کی شہادت میں صہیونی ریاست اسرائیل ملوث ہے اور پاکستان اس دہشت گردی کے واقعے کی مذمت کرتا ہے۔
انہوں نے کہا کہ خوش آئند ہے کہ اس ایوان نے مشترکہ طور پر اس حوالے سے قرار داد لایا ہے، تمام ارکان پارلیمنٹ کا شکر گزار ہوں، یہ خوش آئند ہے کہ ایوان اسماعیل ہنیہ کی شہادت پر متفقہ طور پر قرارداد لے کر آیا ہے۔
شہباز شریف نے کہا کہ قرارداد کی منظوری پر ایوان کا مشکور ہوں، 40 ہزار فلسطینیوں کو شہید کیا جاچکا ہے جس میں بچے، بچیوں اور خواتین کی بڑی تعداد ہے۔
وزیراعظم نے کہا کہ فلسطین آج مقتل گاہ بن چکا ہے، 9 ماہ سے اسرائیل فلسطین میں قتل عام جاری رکھے ہوئے ہے، فلسطین کی بستیوں کی بستیاں قبرستان بن چکی ہیں، ہر طرف بکھرا خون انسانیت کی روح کو جھنجوڑ رہا ہے۔
انہوں نے کہا کہ فلسطینی بیٹی کی پکار آج مسلسل ہمارے ذہنوں میں گونج رہی ہے، فلسطینی آسمان کی طرف دیکھ رہے ہیں کہ یہ ظلم کی رات کب ختم ہوگی۔
وزیراعظم نے یہ بھی کہا کہ فلسطین کی اس بیٹی نے کہا تھا کہ ہمیں اس لیے مارا جارہا ہے کہ ہم مسلمان ہیں، صہیونی ریاست غزہ میں انسانیت کا قتل عام کر رہی ہے۔
قومی اسمبلی میں اسماعیل ہنیہ کی غائبانہ نمازِ جنازہ بھی ادا کی گئی۔
