پاکستان: اسلام آباد میں فلسطین سے یک جہتی کا عظیم الشان مارچ + ویڈیو
اسلام آباد میں فلسطین سے یک جہتی کے عظیم الشان مارچ میں ہزاروں لوگوں نے شرکت کی اور امریکا کی حمایت سے غزہ میں جاری نسل کشی پر مبنی غاصب صیہونی حکومت کے وحشیانہ جرائم کی مذمت کی۔
سحرنیوز/پاکستان: ہمارے نمائندے کی رپورٹ کے مطابق پاکستان کے دارالحکومت اسلام آباد میں اتوار کو جماعت اسلامی کی کال پر غزہ کے مظلوم فلسطینی عوام سے یک جہتی کے اعلان کے لئے عظیم الشان مارچ نکالا گیا۔ اس مارچ میں ہزاروں لوگوں نے شرکت اور اسرائیل نیز امریکا کے خلاف نعرے لگآئے۔
امیر جماعت اسلامی پاکستان حافظ نعیم الرحمان نے اس صیہونیت مخالف مارچ سے خطاب میں کہا کہ دلیر فلسطینیوں کے لئے انصاف کے حصول کے راستے میں ہماری استقامت جاری رہے گی۔
انہوں نے اپنے خطاب میں غاصب صیہونیوں کے خلاف جنگ میں حماس کے بہادر سپاہیوں کی شجاعت کو قابل تعریف بتایا اور فلسطین کے استقامتی محاذ کے شہدا کو خراج عقیدت پیش کیا۔
امیر جماعت اسلامی پاکستان نے کہا کہ ہمیں اسرائیل اور اس کے اتحادی ملکوں کی مصنوعات کا بائیکاٹ کرکے، بیت المقدس پر قابض غاصب صیہونی حکومت کی رگ حیات منقطع کرنے میں تعاون کرنا چاہیے۔ حافظ نعیم الرحمان نے اپنے ملک کی حکومت کو مخاطب کرکے کہا کہ فلسطینی عوام کے ساتھ یک جہتی کے اظہار اور اسرائیل کے خلاف وسیع مظاہروں میں کسی بھی قسم کی رکاوٹ کی پاکستان میں کوئی جگہ نہیں ہے۔
