پاکستانی وزیر دفاع نے ایک بار پھر اشاروں-اشاروں میں افغانستان کی طالبان حکومت کو دی دھمکی!
پاکستان کے وزیر دفاع خواجہ آصف نے کہا ہے کہ پاکستان کی سیاسی و عسکری قیادت مکمل ہم آہنگ ہے، افغانستان سے متعلق قومی پالیسی پر مکمل اتفاق رائے ہے۔
سحرنیوز/پاکستان: پاکستان کے وزیر دفاع خواجہ آصف نے افغان طالبان کے ایک بیان کو گمراہ کن بتاتے ہوئے اس پر ردعمل ظاہر کیا اور یہ دعوی کیا کہ افغان طالبان ہندوستانی پراکسیوں کے ذریعے دہشت گردی میں ملوث ہیں۔ انہوں نے کہا کہ طالبان حکومت اندرونی دھڑے بندی اور عدم استحکام کا شکار ہے، خواتین، بچوں اور اقلیتوں کے ساتھ زور زبردستی کرنا، افغان طالبان کا اصل چہرہ ہے۔
خواجہ آصف نے یہ بھی دعوی کیا ہے کہ طالبان چار برس بعد بھی عالمی وعدے پورے نہیں کرسکے، افغان طالبان بیرونی عناصر کے ایجنڈے پر عمل کر رہے ہیں۔ پاکستانی وزیر دفاع نے کہا کہ پاکستان کی افغان پالیسی قومی مفاد اور علاقائی امن کے لیے ہے، پاکستان سرحد پار دہشت گردی کے خلاف فیصلہ کن اقدامات جاری رکھے گا۔ خواجہ آصف نے مزید کہا کہ جھوٹے بیانات سےحقائق نہیں بدلیں گے، اعتماد عملی اقدامات سے بحال ہوتا ہے۔
