طوفان الاقصی کا وار، امریکی تھنک ٹینک میں بحث
واشنگٹن میں وار اسٹڈیز تھنک ٹینک نے غزہ میں صیہونی حکومت پر حملہ کرنے کے لیے فلسطینی مزاحمتی تحریک حماس کی حکمت عملی کا تجزیہ کیا۔
سحر نیوز/ دنیا: تسنیم نیوز کی رپورٹ کے مطابق، واشنگٹن میں وار اسٹڈیز تھنک ٹینک نے فلسطین کی مزاحمتی تحریک حماس کے مجاہدین کی غزہ میں صیہونی حکومت کے فوجیوں پر حملہ کرنے کی حکمت عملی اور طریقہ کار کا تجزیہ کیا۔
اس تھنک ٹینک نے لکھا ہے کہ جہاں حماس کے مجاہدین غزہ شہر کے وسط میں اسرائیلی افواج کے خلاف اپنی اہم دفاعی حکمت عملی کا استعمال کرنے کی کوشش کر رہے ہیں، وہیں وہ شمالی غزہ میں اسرائیلیوں کے خلاف "ہٹ اینڈ رن" کی حکمت عملی پر عمل پیرا ہیں۔
تھنک ٹینک کے مطابق، شمالی غزہ میں اسرائیلی فورسز کو ٹینک شکن راکٹوں اور مارٹر گولوں سے ہراساں کرنا، مزید جدید ہتھیاروں اور حکمت عملی کو قائم کرنا، اسرائیل کو جنگ بندی پر مجبور کرنے کے لیے ایک طویل جنگ چھیڑنے کے حماس کے اہم اہداف ہیں۔
اس تحقیقی مرکز کے تجزیے میں کہا گیا ہے کہ حماس نے ابھی تک اپنے زیادہ جدید ترین نظام اور حکمت عملی کا استعمال نہیں کیا ہے، جیسے دیسی ساختہ بم، دھماکہ خیز مواد، جدید ٹینک شکن میزائل، یا سڑک کے کنارے نصب زیادہ جدید ترین دھماکہ خیز آلات وغیرہ۔
رپورٹ کے مطابق اس کا مطلب یہ ہے کہ حماس نے اپنی اصل توجہ شمالی غزہ پٹی کے بجائے غزہ شہر پر مرکوز کر رکھی ہے۔
