عالمی عدالت کے فیصلے پر عمل درآمد کا مطالبہ، ہیومن رائٹس واچ
ہیومن رائٹس واچ نے بین الاقوامی برادری سے مطالبہ کیا ہے کہ وہ بین الاقوامی عدالت انصاف کے حکم کی تعمیل نہ کرنے پر صیہونی حکومت پر پابندیاں لگائیں۔
سحرنیوز/دنیا: ہیومن رائٹس واچ نے بین الاقوامی برادری سے مطالبہ کیا ہے کہ وہ غزہ میں نسل کشی کے جرم کو روکنے کے لیے حفاظتی اقدامات اٹھانے کے لیے بین الاقوامی عدالت انصاف کے حکم کی تعمیل نہ کرنے پر صیہونی حکومت کے خلاف پابندیاں لگائیں۔
ہیومن رائٹس واچ نے سوشل میڈیا کے ایکس نیٹ ورک پر اپنے صفحے پر لکھا کہ ممالک کو چاہیے کہ وہ اسرائیل کی حکومت کے خلاف ٹارگٹڈ پابندیاں عائد کریں اور بین الاقوامی عدالت انصاف کے حکم کی تعمیل کے لیے اس حکومت کو ہتھیار دینے سے گریز کریں۔
انسانی حقوق کی اس تنظیم نے نشاندہی کی کہ تل ابیب نے ہیگ میں بین الاقوامی عدالت کے احکامات کی خلاف ورزی کی ہے اور وہ غزہ کی پٹی میں فلسطینیوں کو امداد اور بنیادی خدمات فراہم کرنے کے لیے اقدامات نہیں کر رہا ہے۔ جنوری کے اواخر میں، بین الاقوامی عدالت انصاف نےصیہونی حکومت سے مطالبہ کیا تھا کہ وہ کسی بھی ایسے اقدام کو روکے جسے نسل کشی کا جرم سمجھا جاتا ہے اور غزہ میں نسل کشی کو بھڑکانے والے عوامی تبصروں یا بیانات سے پرہیز کیا جائے۔
عالمی عدالت انصاف نے صیہونی حکومت سے یہ بھی کہا کہ وہ غزہ تک انسانی امداد کی فراہمی کو یقینی بنانے کے لیے تمام اقدامات کرے۔
۔بین الاقوامی عدالت انصاف میں یہ شکایت پیش کیے جانے کے بعد، اقوام متحدہ کے اس قانونی ادارے نے صیہونی حکومت سے مطالبہ کیا کہ وہ غزہ میں نسل کشی کو روکنے اور انسانی امداد کے داخلے کے لیے اقدامات کرے۔ صیہونی حکومت نے عالمی عدالت انصاف کے حکم کو نظر انداز کرتے ہوئے غزہ کے باشندوں کے خلاف اپنے نسل کشی کے جرائم کو جاری رکھا ہے ۔
