برازیل: چھوٹا طیارہ گر کر تباہ۔ 10 افراد ہلاک
برازیل کے سیاحتی شہر گراماڈو میں چھوٹا طیارہ گرنے سے ایک ہی خاندان کے 10 افراد ہلاک ہو گئے ہیں۔
سحرنیوز/دنیا: غیر ملکی میڈیا کے مطابق برازیل کے سیاحتی شہر گراماڈو کے مرکز میں ایک چھوٹا طیارہ دکانوں پر گر کر تباہ ہو گیا ہے جس کے نتیجے میں طیارے میں سوار تمام 10 افراد ہلاک ہو گئے ہیں۔ طیارے میں اس کا مالک اور اس کے اہلِ خانہ سوار تھے۔ یہ تمام افراد موقع پر ہی ہلاک ہو گئے ۔ اس حادثے میں زمین پر موجود 17 افراد بھی زخمی ہوئے ہیں۔ زخمی ہونے والے افراد میں سے 12 اب بھی مقامی اسپتال میں زیرِ علاج ہیں جن میں سے 2 کی حالت تشویش ناک ہے۔ پائپر پی اے 42-1000 طیارے کو گزشتہ صبح لوئیز کلاڈیو سالگوئیرو گیلیزی نامی ایک تاجر اُڑا رہا تھا، جس میں اس کے خاندان کے افراد سوار تھے۔ ریاسٹ ریو گرانڈے ڈو سل کے سیکیورٹی سیکریٹریٹ کے مطابق طیارے نے کینیلا ایئر پورٹ سے اُڑان بھری تھی، جو ٹیک آف کے فوراً بعد گر کر تباہ ہو گیا تھا۔ طیارہ حادثے سے قبل ایک عمارت کی چمنی اور پھر ایک گھر سے کی دوسری منزل سے ٹکرا کر فرنیچر کی دُکان پر گرا۔
