لاس اینجلس : آتشزدگی سے مرنے والوں کی تعداد 16 ہوگئی
لاس اینجلس میں تیز اور خشک ہواؤں کے باعث آگ مسلسل پھیلتی جا رہی ہے اور مرنے والوں کی تعداد میں بھی اضافہ ہو رہا ہے۔
سحرنیوز/دنیا: غیرملکی میڈیا کے مطابق امریکی ریاست کیلی فورنیا کے شہر لاس اینجلس میں تیز ہواؤں اور ہوا میں نمی کے کم تناسب سمیت موسمی حالات میں شدت کا سلسلہ جاری ہےجس کی وجہ سے جنگل کی آگ مسلسل پھیل رہی ہے اور متاثرین کی تعداد میں اضافہ ہو رہا ہے۔ نئے اعداد و شمار کے مطابق اب تک کم از کم 16 افراد جان کی بازی ہار چکے ہیں، 10,000 عمارتیں تباہ ہو چکی ہیں اور 153,000 لوگوں کو انخلا کے احکامات موصول ہو چکے ہیں۔ ماہرین موسمیات نے پیش گوئی کی ہے کہ اس ہفتے کے آخر میں لاس اینجلس میں تیز اور خشک ہواؤں میں شدت پیدا ہوگی، جس سے علاقے میں آگ کی صورتحال مزید ابتر ہوجائے گی۔ لاس اینجلس کے فائر چیف کرسٹین کرولی نے فاکس نیوز کو بتایا کہ ان کے محکمہ کے بجٹ سے 17 ملین ڈالر کی کٹوتی اور پانی کی فراہمی کے مسائل نے فائر فائٹرز کی جنگل کی آگ پر قابو پانے کی صلاحیت کو کم کر دیا ہے۔ آتشزدگی میں ہلاک ہونے والے 16 افراد میں ایسے 4 سیاہ فام افراد بھی شامل ہیں جو اپنے گھروں سے نکلنے کے قابل بھی نہیں تھے۔ مقامی رپورٹس بتاتی ہیں کہ ان لوگوں میں سے ایک 63 سالہ معذور شخص اپنے بیمار بیٹے کے ساتھ موجود تھا اور آگ لگنے کے وقت اپنے بیٹے کو اکیلا نہیں چھوڑ سکتا تھا، لہذا دونوں جل کر ہلاک ہوگئے۔
